DesAires konpainiaren eskutik, 'À Peine' antzezlana Landetxen
Hitzik gabeko antzezlana da, eta emakumeen aurkako indarkeria eta abusua dira lanaren ardatza. Hilaren 15ean izango da lana ikusteko aukera.
Oiartzungo Antzerkizale Elkarteak antolatuta, DesAires konpainiaren À Peine antzezlana izango da Landetxen hilaren 15ean, 19:00etan.
Oholtzan Xabi Lopez Jabato herritarra, Tamara Lysek, Jean François Meuwly Paco eta Joël Corboz ariko dira, eta aurreratu dute Euskal Herriko estreinaldia izango dela Oiartzungoa [Errenteriako Niessen Aretoan apirilaren 19an izango dira].
Lopezek berak sareetan azaldu duenaren arabera, À Peine antzerki fisikoko obra bat da; hau da, hitzik gabea. Lana DesAires konpainiak sortu du, eta haren kideetako batzuk Suizatik bertaratuko dira; “ez da askotan gertatzen halako ekoizpen bat hemen ikusteko aukera izatea”, dio.
Era berean, oiartzuarrak aurreratu du obrak izaera ilun eta poetikoa duela, baina baita izaera grotesko eta komikotasuna ere “kontraste gisa, arnasa eta beste irakurketa batzuk eskainiz”. Horretaz gain, kontatu du antzerki fisikoa, dantza, musika eta akrobaziak uztartzen dituela, eta azpimarratu du emakumeen aurkako indarkeria eta abusuaren inguruko pieza “indartsua” dela, irudien eta gorputzaren bidez kontatua.
Honakoa da lanaren sinopsia: Gorpu profanatuak. Hondakinak. Izenik gabeko hildakoen pilaketa. Emakume bat, zabortegi baten erdian esnatzen da. Legez kanpoko mundua; margenetakoa, eroena, baztertuena. Bere malkoek, galdutako duintasun baten usaina dute. Hustuta, arnas hari bati lotuta, emakumea noraezean dabil eta bere oroimen bortitzekin egin du topo. Txerrien algarak, itzalen oihartzunean dantzan.
Antzezlana ikusteko sarrerak erosi behar dira, eta hemen eskura daitezke horiek.
