Aldaketak trafikoan Inauterien harira
Garraio publikoari ere eragingo diote aldaketa horiek, eta aparkaleku alternatiboak zabalduko dituzte.
Trafiko aldaketak izango dira Atlantikaldiaren harira. Inauteriak direla eta Errenteria-Oreretako eremu handi batean trafiko aldaketak egingo ditu udalak, eta horiek garraio publikoari ere eragingo diote.
Otsailaren 15ean, igandean, konpartsen desfilea dela eta, 11:00etatik 15:00etara itxita egongo da desfileak igaroko duen ibilbidea: Pontika-Arramendi pasealekua, Errioxako biribilgunea, Tulle, Maria de Lezo, Xenpelar, Biteri, Nafarroako biribilgunea, Nafarroako etorbidea, Galiziako biribilgunea, Nafarroako etorbidea, Zumardia, Santa Klarako biribilgunea, eta Gabierrota biribilgunea.
Horrez gain, desfileari begira, otsailaren 14ko 21:00etatik, otsailaren 15eko 15:00etara, ibilgailuak ezingo dira aparkatuta egon Tulle, Maria de Lezo, Xenpelar eta Biteri kaleetan, ezta Nafarroa etorbidean, Galizia eta Santa Klara biribilguneen artean. Gainera, Alabergako 4 eta 6 zenbakien arteko eremua ere itxiko dute ekitaldiak irauten duen bitartean taxi geltokia tokiz aldatuko dutelako.
Igandean, desfilea hasi baino 30 minutu lehenago, Beraun eta Arramendi arteko bidegurutzea, Arramendi pasealekua eta Errioxako biribilgunea itxiko dituzte.
Udalak gidariei eskatu die desfilean zehar erdigunetik ez dezatela zirkulatu, eta bide alternatiboen erabilera gomendatu die, hala nola, GI-636 errepidea. Igandean Altxu eta Gaztaño kaleetako irteera moztuta egongo da 10:30etik 12:00etara; hori horrela behin-behineko irteera Gaztañoko 40 zenbakitik izango da.
Garraio publikoa
Trafikoa mozteak garraio publikoko linea batzuetan ere eragina izango du. E01 Pasai Donibane – Donostia, E02 Oiartzun – Donostia, E03 Pasaia – Donostia, E5 Errenteria-Donostia (Beraundik) eta E27 Hondarribia – Donostia lineatan. Diputazio plaza, Zumardia, Gabierrota eta Lartzabal geltokiak, Altamira, Arragua eta Lintzirinera lekualdatuko dituzte.
Hiri barruko garraio zerbitzuko geltokiak ere bertan behera geratuko dira, kaleak trafikoarentzat libre geratu arte. Lehenengo, geltokia Tulle kalera pasako da, eta, ondoren, Xenpelar eta Morronguilleta kaleetako ohiko geltokiak erabiliko dira.
Aparkaleku alternatiboak jarriko dituzte, bestalde, larunbata eta igandean aparkatzeko, Fanderiako tenis pistan, Arramendiko zabalgunean (Lousada), eta Mikel Irastorza aparkalekua (Udal Euskaltegiaren atzean).
