Lezoar guztientzako inauteriak
20 ekitaldirik gora daude bihar hasiko diren inauterien ekitaldien zerrendan. Gai bat ('Kirolak') eta bi izen propio izango dira nagusi: Trapujale eta Xanti Val.
Ainhoa Salaberria Kultura teknikaria, Xanti Val teknikari izandakoa, eta Jon Legorburu Kultura zinegotzia.Lezoko Udala Denenak eta denentzat. Hala izango dira 2026ko Lezoko inauteriak. Bihar (hilak 12, osteguna) hasiko dira Trapujaleren etorreran zentratuko diren ekitaldiekin, eta bukaerarako ere (hilaren 17ko Asteartebeltz) Jaizkibelen bizi den pertsonaiaren gainekoak prestatu dituzte, lehen eguneko jarduerarekin alderatuta, ez hain gozoak. Edonola ere, 20 ekitalditik gora jasoko dituzte herriko inauteriek aurten, eta izen propio bat (Trapujalerenaz aparte) izango dute: Xanti Val Zabaletarena.
Izan ere, Trapujale Taldeak erabaki du aurtengo oroigarria Vali ematea, herriko inauterien alde nahiz kulturaren alde egindako lanagatik. Izan ere, 1989tik izan da Val Lezoko Udaleko Kultura teknikari, iaz arte, erretiratu baitzen. Hala, inauterien aurkezpenean hura, Kultura teknikari berri Ainhoa Salaberria, eta Jon Legorburu Kultura zinegotzia izan dira. Legorburuk herritar orori egin dio inauterietaz gozatu eta parte hartzeko gonbita; Salaberriak egitarauaren xehetasunak (behean zerrenda osoa) eman ditu, nabarmenduz aurten 38 urte beteko direla Trapujale inauterietan Lezora jaisten denetik, eta Larunbatgorriko gaia Kirolak izango dela.
Valek esker oneko hitzak izan ditu Trapujale Saria jasotzeagatik, baina aitortza pertsonaletik harago doala esan du: “Omenaldi hau ez dut zerbait pertsonala bezala hartzen, Lezoko kulturaren garai oso bati egindako aitortza gisa baizik”. Harro mintzo da Val herriko inauteri aroaz: “Herri baten kulturak neurgailu ugari ditu, kaleetako parte-hartzea da bat, oso inportantea eta Lezon bizirik dago. 30 urte hauetako nire saririk ederrena ez da omenaldi hau, Lezoko inauteriak udal honetan oina jarri nuen lehen egunean zuen kolore eta indar berbera duela ikustea baizik”. HITZAren ostiraleko astekarian Xanti Vali egindako elkarrizketa irakurri ahalko da.
Beheko koadroan ageri den egitaraua etxeetan jasotzen ari dira lezoarrak. Bestela, Lezoko Udalaren webgunean nahiz aplikazioan ere eskura daiteke jardueren zerrenda.
2026ko Lezoko inauteriak. Egitaraua.
Otsailak 12, Ostegunzuri.
- 16:00. Trapujale Txikia Lezo Herri Eskolan.
- 19:30 Trapujale Jaizkibeldik herrira jaitsiko da. Ondoren pregoia eta arranpuila.
- 20:00. Trapujale Taldearen omenaldia Xanti Vali.
Otsailak 13, Ostiralori.
- 09:15. Lezo Herri Eskolako eta Lezo Institutuko ikasleen desfilea.
- 10:30. Lezo Herri Eskolako eta Lezo Institutuko ikasleen ikuskizuna Bekoerrota kiroldegian. Gaia: Joko Olinpikoak.
- 11:15. Pasaia-Lezo Lizeoko ikasleen Trapujale Festa Gurutze Santuaren plazan.
- 17:30. Gurutze Santuaren plazan, Sorgin dantza eta Zirikuen kalejira.
- 18:15. Lezoko Dantzazaleen desfilea.
- 19:20. Gurutze Santuaren plazan, Lezoko Dantzazaleen eskutik Zuberoako dantzak.
- 21:30. Pasaia-Lezo Lizeoko jangelan, Trapudrama bertso afari tematikoa. Bertsolariak: Maddi Ane Txoperena, Igor Elortza, Maider arregi eta Andoni Rekondo. Trapujalez edo haren inguruko pertsonaiaren batez mozorrotu behar da. Txartelak Arrutin eta Tiñelun salgai.
Otsailak 14, Larunbatgorri.
- 11:30. Kale Nagusiko Murixka Dantza Taldearen egoitzatik abiatuta, Euskal Herriko hainbat inauteritako dantzekin kalejira Murixkaren eskutik. Gurutze Santuaren plazan bukatuko dute bidea.
- 17:00. San Pedro auzotik, herri desfilea Jaixkipe txarangak girotua. Gaia: Kirola.
- 19:00. Karlos Saldise plazatik abiatuta, karro-poteoa. Jarraian, mozorro festaren aurkezpena eta talde argazkia Gurutze Santuaren plazan.
- 21:00. Koldobike Gezala pilotalekuan, mozorroen herri afaria, eta sarien banaketa. Gaia: Kirola.
- 23:30. Koldobike Gezala pilotalekutik abiatuta, Poteo txarangarekin kalejira.
Otsailak 16, Astelehenarre.
- 17:30. Gurutze Santuaren plazan, Lezoaundi Erraldoi eta Buruhandien Konpartsaren aurkezpena. Ondoren, kalejira.
Otsailak 17, Asteartebeltz.
- 15:00. Lezo Herri Eskolan, Trapujaleren Epaiketa Txikia. Ondoren, txokolatada.
- 19:00. Gurutze Santuaren plazan, Trapujaleren Epaiketa eta ondoren Herio Bidaia.
