San Markon aurkitutako animalia hondakinen inguruko informazioa eguneratu du udalak
Duela hiru aste herritar batek San Markon egindako animalien hondakinen aurkikuntza dela eta, Errenteriako Udalak ikerketa bat jarri zuen abian, gertaera horren nondik norakoak argitzeko, eta informazioa eguneratu du.
Duela hiru aste herritar batek San Markon egindako animalien hondakinen aurkikuntza dela eta, Errenteriako Udalak ikerketa bat jarri zuen abian, gertaera horren nondik norakoak argitzeko. Urtarrilaren 21ean emandako argibideen ondoren, udalak martxan jarritako ikerketaren orain arteko aurrerapenaren berri eman du.
Zabor-poltsa batzuen ondoan aurkitu ziren txakur baten gorpuzkiei dagokienez, jabea nor den argitzeko lanean jarraitzen dute ikerketaren arduradunek, baina gorpuzkiak aztertzerakoan ez dute indarkeria zantzurik aurkitu.
Bigarren kokapen batean, ardien hondakinak eta bestelako hondakin mota batzuk aurkitu zituzten poltsa batzuen barruan. Bigarren aurkikuntza hori lursail partikular batean egin zen. Udala lursailaren jabearekin harremanetan jarri dela jakinarazi du eta, hondakinak norenak diren zehaztu ezin izan bada ere, ohiko prozedurari jarraiki garbiketa lanak egin ditzan errekerimendua egingo zaio.
