Pasaian energia komunitate bat sortzea bultzatuko du aldundiak
Aldundiko Jasangarritasun Departamentuak eta Pasaiako Udalak herritarrei irekitako hiru saio antolatu dituzte datozen egunetan San Pedroko Udal Aretoan.
Gipuzkoako Foru Aldundiko Jasangarritasun Departamentuak, Energia Eraldaketarako Bulegoaren bidez, Pasaian energia komunitate bat sortzea bultzatuko du, herritarrei irekitako hiru saio antolatuta, Pasaiako Udalarekin lankidetzan. Saioak hilaren 19an (osteguna) eta martxoaren 5ean eta 26an izango dira, den-denak San Pedroko Udal Aretoan, 18:30ean.
Saio horien helburua da pasaitarrei informazioa, prestakuntza eta laguntza ematea tokiko energia komunitate bat sortzeko prozesuan, “energia eredu bidezkoagoa, parte hartzaileagoa eta jasangarriagoa sustatuz, energia berriztagarriaren sorkuntzan eta kontsumo partekatuan oinarrituta”.
Lehen saioan energia komunitateak zer diren eta ingurumenaren, gizartearen eta ekonomiaren ikuspegitik zer onura dituzten azalduko da. Bigarrenean energia komunitate bat osatzen duten funtsezko eragileak eta eskura dauden finantzaketa aukerak eta bultza daitezkeen proiektuak ezagutaraziko dituzte. Azkenik, hirugarren bilkuran energia komunitate bat nola kudeatu eta abian jartzeko pausoak emango dira, Pasaiako energia komunitatea sortzeko ibilbide orria ezarriz.
San Pedroko saioak aldundiko Jasangarritasun Departamentuaren estrategiaren barruan kokatzen direla jakinarazi dute, “eredu energetiko jasangarriago, demokratikoago eta kolaboratiboago baterantz aurrera egiteko, herritarrei informazioa, aholkularitza teknikoa eta laguntza ekonomikoa emanez energia berriztagarriko tokiko proiektuak bultzatzeko. Energia Eraldaketarako Bulegoaren bidez, laguntza teknikoa, juridikoa eta administratiboa eskainiko dela baietsi du aldundiak, baita laguntza ekonomikoak ere autokontsumoko, biltegiratzeko eta mugikortasun elektrikoko instalazioetarako”.
Eredua
Aldundiak adierazi du bere estrategia dela “trantsizio energetikoa herritarren inplikazio aktiboaren bitartez eraikitzea”. “Energia komunitateek aukera ematen dute pertsonak energia sistemaren erdigunean jartzeko, autokontsumo partekatua, faktura elektrikoaren murrizketa eta energia pobreziaren aurkako borroka erraztuz, eta, aldi berean, eredu garbiagoa eta ingurunearekiko errespetuagoa sustatuz”, esan du aldundiak.
Aldundiak jakinarazi du 67 energia komunitate daudela martxan Gipuzkoako 59 udalerritan .Horiek 10.000 familia baino gehiago biltzen dituzte. Jasangarritasun Departamentuaren helburua da 2027an udalerri guztiek gutxienez energia komunitate bat martxan izatea.
Pasaiako Udalaren lan ildo nagusia, aldiz, Pasaia berdeago baten aldeko apustua egitea dela zehaztu du aldundiak, “trantsizio energetikoarekin, energia berriztagarrien erabilerarekin, erregai fosilen murrizketarekin, Berotegi Efektuko Gasen isurien jaitsierarekin eta larrialdi klimatikoari aurre egiteko estrategiarekin lotuta”.
Datozen egunetan egingo diren saioen bidez, udalaren xedea da “herritar interesdunei informazioa, tresnak eta ezagutza eskaintzea, energia komunitate bat sortzeko aukera erreala izan dezaten, betiere herritarren borondatean eta inplikazioan oinarrituta”. Udalak adierazi du prest dagoela aholkularitza teknikoa eta laguntza eskaintzeko, herritarren aldetik interes nahikoa balego. Izan ere, udalak 2026ko aurrekontuetan aurreikusia du prozesu hori laguntzeko partida ekonomiko bat.
