"Musikarekiko nuen ikuspegia zabaldu dit La Vozek"
Sona handia duen 'La Voz' programaren azken edizioan aritu da Oihan Aristizabal Cruz oiartzuarra. Ez da saioan parte hartu duen lehen aldia; bai, baina, finalera iristen dena.
Oihan Aristizabal, Oiartzungo Doneztebe plazan. Imanol Saiz Gomez de Segura Oihan Aristizabal Cruz gazte oiartzuarra Antena 3 katean ematen den La Voz programan izan da berriki, nola gainera, amaieraraino lehiatu eta finalera iritsi baita. Sebastian Yatra abeslariaren gidaritzapean aritu da, eta bizitzako esperientziaz mintzo da.
La Voz saioan egon zara berriki. zer nolako esperientzia izan da?
Esperientzia bikaina izan da. Lagun pila bat egin ditut, eta ez nuen horixe espero, ez baitaukat nire burua oso pertsona irekitzat. Denok bizipen bera partekatu dugu, eta bakoitzak bere istorioa dauka musikarekin lotuta. Uste dut horregatik izan dela esperientzia oso alaia. berriro itzuli nahi dut [barrez].
Zerk bultzatu zaitu La Vozen parte hartzera?
Egia esan ez zegoen nire asmoen artean La Voz-en parte hartzea, baina saioko lantaldea jarri zen nirekin harremanetan. La Voz Kids saioan ibili nintzen, eta esan zidaten oraingoan La Voz-en sartzeko aukera nuela sarrera probak-eta saltatuta, aurrez eurekin egondakoa nintzenez nire informazio basikoa bazutela-eta.
Inori ezer esan gabe baiezkoa eman nuen, eta nire bideoa bidali nien. hartu ninduten, eta oso pozik nago.
Duela hiru urte ibili zinen La Voz Kids saioan. Zertan ezberdindu dira bi aldiak?
La Voz Kids grabatu eta gutxi gora behera urtebete geroago bota zuten telebistan. Uste dut hori izan dela ezberdintasun nagusia, oraingoan gauza berri gehiago probatzeko aukera izan baitut.
Aurreko edizioan ez nintzen oso urrutira iritsi, eta hemen zuzeneko faseetara iritsi naizenez telebistaren atzean zer dagoen gehiago ikusteko aukera izan dut. Oholtza aldaketak, publizitateak, ordu tarteak… denak nola funtzionatzen duen ikusteko aukera izan dut.
Oraingoan, baina, finalera iritsi zara. Espero zenuen, ala ezustean izan zen?
Finalea iristea niretzat izugarria izan da. Amarekin askotan hitz egin izan dut horren inguruan, eta amak beti esaten zidan ez nintzela pasako finalera. Berak beti ekarri dizkit oinak lurrera; beti esaten zidan oso ondo egiten nuela, baina presente izateko finalera ez iristeko aukerak ere hor zeudela.
Baina azkenean, horra, finalera iritsi nintzen. Ikus-entzuleek bozkatzen dute, eta eurak dira finalera zein pasa aukeratzen dutenak. Ez nuen uste pasako nintzenik, are gutxiago euskalduna izanik. Gainera, pentsa, irabaziz gero Espainiako ahotsik onena edo horrelako zerbait deitu beharko zidaten, nolabait esatearren.
Ez nuen esperantzarik, baina begira, badirudi jendeari Como una ola gustatu zaiola [barrez].
Programan sartu eta fina bitartean zein pausu ematen dira?
Programara iritsi eta telebistan ateratzeko hiruzpalau audizio daude: bideoa, aurrez aurrekoa, eta gero beste bi proba Madrilen. Atal horiek guztiak gaindituz gero audizioetara pasatzen zara, eta hori da atal ezagunena nire ustez; audizioetan coach-ak guri bizkarra emanda izaten dira abesten dugun bitartean, eta entzundakoa gustatuz gero bira ematen dute.
Gero, batailak egoten dira, eta horiek taldeka egiten dira. Behin fase hori amaituta, hurrengoa asaltos deitzen dena izaten da. Zati horretan indibidualki abesten dugu, eta abesten dugun guztion artean aukeraketa egiten dute. Horien artean bat pasatzen da zuzenekoetara; kasu honetan, ni. Sebastian Yatrak aukeratu ninduen, eta hari esker zuzenekoetara joatea lortu nuen.
Behin aukeraketa eginda, hiru zuzeneko egoten dira; lehena nolabait esatearren hautaketa egiteko izaten da, bigarrena final aurrekoa eta azkenik, finala.
Sebastian Yatra izan da zure coach-a. Nolakoa izan da maila horretako abeslari batekin lan egitea?
Oso ondo joan zen; egia esan oso mutil jatorra da. Maila horretako pertsonak edota horren famatuak direnak nahi gabe ere idealizatu egiten ditugu, eta uste dugu beste mundu batean bizi direla, baina finean, gizakiak dira, pertsona normalak.
Sebastian [Yatra] oso mutil alaia da, gauza onak esaten zizkigun uneoro. Behin harekin abestea suertatu zitzaigun, eta esaten zigun hark baino hobeto abesten genuela [barrez].
Zer du zure ahotsak berezitik? Zergatik uste duzu gustatu dela horrenbeste?
Uste dut hor gakoa izan zela musika estiloaren eta ahotsaren arteko kontrastea. Hasieran oso lotsatuta egoten nintzen, eta, gainera, nirea bezalako ahotsak ingelesez abesten entzutea oso ohikoa da. Yatrak berak gomendatu zidan gazteleraz abesteko.
Como una ola abestu nuen, eta hala iritsi nintzen finaleraino; arrakasta handia izan zuen.
Beraz, abestia zuk aukeratzen duzu edo coach-ak ematen dizu?
Saioan sartzen zaren unean zerrenda bat egin behar da hogei abestirekin, baina lehenengo aukeraketetan eurek erabakitzen dute zer abestu.
Gero, baina, coach-ekin denbora gehiago egoten gara, eta nik zortea izan nuen Yatrarekin, noizbait eskatu baitut abestia aldatzeko eta aldatu egin didate.
Beraz, esan daiteke nolabait eurek aukeratzen dituztela abestiak baina guk ere badugula abestiaren inguruan gure iritzia ematerik.
Zer erakutsi dizu programak?
Beti izan dut musikatik bizitzeren mundu edota ideia hori oso idealizatua. Beti esaten da musikatik bizitzeko oso famatua izan behar dela, baina hemen ikusi dut jende askok duela izena, eta ikusi dut musikaren munduan zenbat lan ezberdin dauden.
Musikarekiko nuen ikuspegia irekia dit La Voz-ek.
Saiotik une bakar batekin geratu behar izango bazenu, zein izango litzateke?
Finalean Antia irabazle izendatu zutenen unearekin geratuko nintzateke. Guretzat oso polita izan zen; lagun handiak egin gara saioan, eta hori oso polita da.
Finala baino egun bat lehenago hitz egiten aritu ginen eta esaten zidan une batez bazen ere imajinatzeko biok ginela pertsona bozkatuenak. Nik ezinezkoa zela esaten nion, eta, begira, bada azkenean hala izan zen, biok izan baikinen lehiakide bozkatuenak. Hala ere, ez dut inoiz ahaztuko saria eskaini zidan unean zenbat negar egin nuen.
Telebistan ikusten denaz aparte, nola dago lehiaketa antolatuta?
Normalean zuzenekoez aparte emanaldiak grabatuak izaten dira, eta ostiraletan grabatzen dira. Hortaz, asteartean hara eramaten gaituzte eta egun horretan arropa probaketa egiteaz gain kamerekin entseguak egiten dira, eszenaratzea nolakoa izango den ikusten dugu… Eta esandakoa, ostiralean aurretik prestatutakoarekin egiten dira grabaketak edota zuzenekoa, eta han ibiltzen gara goizeko ordu biak inguru arte.
Animatuko zenuke jendea La Voz bezalako saioetan parte hartzera?
Bai, noski. Uste dut jende lotsati asko gaudela musikaren munduan, ez soilik abeslariak baizik eta instrumenturen bat jotzen dutenak ere. Talentudun jende asko dago, eta asko geratzen dira euren logeletan munduari erakutsi gabe euren talentua.
Gainera, izugarrizko poza ematen du ikusteak nik horrenbeste disfrutatzen dudan horrekin jendea nola sentitzen den.
Orain, La Voz-eko ibilbidea bukatuta, zein asmo duzu musikan?
orain arte gradu bat ikasten ari nintzen, baina utzi egin dut, eta erabaki dut musikari lotutako zerbait ikasi nahi dudala. Niretzat ikasketak oso garrantzitsuak dira, eta horregatik hurrengo urtean musikaren inguruko zerbait ikasteari ekingo diot.
Gainontzean, bestela, badakit zaila dela musikatik bizitzea, baina uste dut zerbait argitaratuko dudala noizbait. Ez da erraza, baina ikusiko da.
