Domiko eta Erreka makroproiektuak, Oarsoaldetik begiratuta
Hitzaldia antolatu du Gaztañoko auzo elkarteak ostiralean, bi proiektu horiek Oarsoaldean izango duten eragina ezagutzeko.
Bianditz-Domiko bizirik plataformaren protesta bat. Domiko eta Erreka makroproiektu eolikoak izango dituzte hizpide Gaztañoko auzo lokalean ostiralean, hilak 20, auzo elkarteak antolatuta. Repsol gas eta petroleo enpresa dago bi makroproiektu eoliko horien atzean eta horiek, Oarsoaldea inguruko mendietan eraiki nahi ditu.
Proiektu horien aurka herritar ugari azaldu dira, eta Euskal Herria makroproiektu eolikoz bete nahian dabiltzala salatu dute. proiektuen aurka azaldu dira hainbat herritar plataforma, eta gutxienez, eztabaida justu bat eskatzen ari dira gaiaren inguruan. Ostiralean, horietako bi plataforma izango dira informazioa ematen eta hausnarketari bidea zabaltzen Gaztañoko auzo lokalean: Bianditz-Domiko bizirik eta Urumeako mendiak bizirik, hain zuzen ere.
Gaiaren gaineko informazio gehiago nahi duen orok, aukera paregabea izango du ostiralean, 19:00etan. Parte hartzera deitu dute antolatzaileek.
