'Azken oihartzuna', Oiartzunen grabatutako film laburra
Unibertsitateko proiektu bezala hasi zen, baina Azken Films taldea sortu zuten azkenerako. Allende Urritegi oiartzuarra da zuzendaria.
'Azken oihartzuna' filmeko lantaldea. Unibertsitate proiektu bezala hasi zen Azken oihartzuna, baina, sortu duten taldea eta zinema munduan murgiltzeko nahiak ikusita, Azken Films taldea osatu dute Mondragon Unibertsitateko zenbait ikaslek, tartean, Allende Urritegi oiartzuarrak.
Film labur honetan hiru hilabetez aritu da lanean sei pertsonako lantaldea. Bakoitzak bere lana izan du, eta Urritegi gidoilari eta zuzendari lanetan aritzeaz gain, edizioaz ere arduratu da bide honetan.
“Prozesu oso aberasgarria izan da; egia da ez dela super proiekzio bat, gure lehenengo lan profesionala baita, baina ni asko lagundu nau zinema munduan murgiltzen eta martxa hartzen. Betidanik izan dudan ametsa izan da zuzendari izatea, eta oso lan txukuna egin dugu. Emaitzarekin oso gustura geratu gara”, azaldu du oiartzuarrak.
Film laburra Peruene baserrian grabatu dute, eta herriko zenbait establezimenduren laguntza ere izan dute. Berriki publiko egin dute ikus entzunezkoa, eta dena herrian egindako proiekzioa izanik, Oiartzunen proiekzio bat egitea gustatuko litzaiekeela azaldu du Urritegik.
Honakoa da sinopsia: Eris bere haurtzaroko herrira eta baserrira itzuli da. Amonarekin bizi izan zen haurtzaroko zati garrantzitsu batean, baina Eris kanpoan zela hil zen amona, eta ezin izan zuen agurtu.
Egun batean, baserrian dagoela, amonak utzitako liburuxka bat aurkituko du Erisek, eta hori aurkitzean gauza arraroak gertatzen hasiko dira baserrian.
