Topoaren ibilbide osoa lurperatzea nahi dute Fanderia eta Erramun Astibiako bizilagunek
Fanderia eta Agustina artean ETSk eraiki nahi duen azpiestazio elektrikoa etxebizitzetatik urrun eramatea ere eskatu dute.
Topoa Fanderian barrena.Alan Gravic Fanderia eta Erramun Astibia kalean ere argi esan dute bizilagunek, Topoak bidea lur azpitik egitea nahi dute, gaur egungo ibilbidearen ordez, eta horrenbestez Galtzarabordatik Oiartzunera arteko ibilbidea lurrazpikoa izan dadila osorik eskatu dute. Beste eskaera bat ere egin dute Fanderia auzokoek eta Erramun Astibia kaleko bizilagunek. ETS Euskal Trenbide Sareak trakzio elektrikoko azpiestazioa eraiki behar du eta horretarako bi horien arteko kokagunea aukeratu du. Bada, argi esan dute auzotarrek ez dutela etxe artean egitea onartuko eta horren ordez, etxebizitzetatik aldenduta dagoen eremu batera eramateko exijitu dute.
Atzo egin zuten batzarra Fanderia auzoko bizilagunek, eta bertan izan ziren, halaber Agustinak auzoko Erramun Astibia kaleko auzotarrak ere. Bi aztergai izan zituzten mahai gainean Topoak auzoan barrena egiten duen ibilbidea eta azpiestazio elektrikoa. Gaiaren bueltan egiten duten bigarren batzarra da, eta atzo ere jendetsua izan zela azaldu dute Fanderiako auzo elkarteko arduradunek.
Kezka eta egonezina sumatzen dela bizilagunen artean adierazi dute, bestalde, “Topoak maiztasuna handitzen duenean, zazpi minutuero pasatzen denean, gure etxeen aurretik 280 Topo igaroko dira egunero; ez da huskeria”.
Bileran ekarpen ugari jaso dituztela gaineratu dute auzo elkartekoek: “Erabakiak hartu dira eta auzoak bizi kalitate duina izan dezan lantalde bat sortu da”. Eskaera argia da: “Fanderiatik Topoa lur azpitik pasatzea nahi dugu, lurperatzea, eta azpiestazio elektrikoa lekuz aldatzea”.
