Boveda Gazte Taldea, sei hamarkadaz herria egiten
Boveda 1966an Trintxerpen sortutako gazte taldea da. Gipuzkoako aisialdi talde zaharrena da, eta aurten 60 urte beteko ditu. Bihar eta etzi inauterietako desfileetan aterako dira.
Antxokoak, Donibanekoak eta Trintxerpekoak egin ondoren, Pasaiako inauteriek jarraipena izango dute asteburu honetan, Trintxerpekoak ospatuko baitira gaurtik igandera bitartean (hilaren 20tik 22ra). Ohi bezala, desfileek, karrozek eta konpartsek kolorea emango diote barruti urdinari. Izan ere, bihar eta etzi (larunbatean eta igandean) konpartsen desfileek Trintxerpeko kaleak hartuko dituzte, 17:00etatik aurrera. Konpartsen artean etxeko bat arituko da, Trintxerpen sona handia duen Boveda Gazte Taldea.
Boveda 1966an Trintxerpeko Karmengo Ama parrokian sortutako aisialdi taldea da. Garaiko apaizak elizako bobedan elkartzen ziren jarduerak prestatzeko, eta bobedan biltzen zirenez, izen hori jarri zioten Trintxerpeko gazte taldeari. Garaiko testuingurua ardatz hartuta, barrutiko gazteei aterabide bat emateko asmoz sortu zen Boveda. Lehen urteetan kanpamentuak egiten zituzten, eta horiek arrakastatsuak zirela ikusita, jarduna urte osora zabaldu zuten.
Ordutik, herria egiten ari da Boveda Gazte Taldea, eta belaunaldiz belaunaldi pasatzen joan da, bere jarduna sendo mantenduz. Eider Soage Varela da egungo begiraleetako bat, eta kontatu du ostiralero biltzen direla barrutiko eta inguruko gazteekin jolasteko eta ondo pasatzeko. Bovedak 8 eta 19 urte arteko gazteei ematen die aterpe. Egun, adinka banatutako bost talde kudeatzen dituzte, eta 150-200 gazte mugitzen dituzte astero, barrutian zeharo errotua dagoen seinale. Saioak ostiraletan izaten dira, 18:30etik 22:30era, eta talde bakoitzak ordu eta erdi egiten du Bovedan. Asteroko saioez gain, udan kanpamentuak egiten dituzte, ikasturtean zehar bi asteburu pasa egiten dituzte elkarbizitzetarako, eta urtero-urtero konpartsa bat ateratzen dute inauterietan.
Jolas eta ekintzen bidez, gazteak balio jakin batzuetan hezten dituztela nabarmendu du Soagek. Errespetua, enpatia, talde lana, parekidetasuna eta euskara erdigunean jartzen dituzte Bovedan, gazteak hausnarketara eta pentsamendu kritikora bultzatuz.
Orain, datak ikusita, inauterietako zita buru-belarri prestatzen ari direla adierazi du Soagek. Bovedakoa «konpartsa familiar» bat da, eta guztiei begirako gai bat aukeratzen saiatzen direla aitortu du gazte taldeko begiraleak. Aurten edo datorren urtean laugarren filma aterako dela aprobetxatuta, Cars pelikula da konpartsarako hautatu duten gaia. Bovedan aspalditik zeramaten ideia horrekin buruan, eta aurten egikaritu egingo dute. «Uste dut asmatu dugula», esan du Soagek.
Bovedak 1980ko hamarkadan sortu zuen konpartsa, eta hasieran soilik Trintxerpen hartzen zuen parte. Ondoren, Donostiara joaten hasi ziren, eta, egun, inauterietako larunbat eta igande arratsaldetan joaten dira hiriburuko desfilera. 2013tik, Errenteria-Oreretakoan ere ateratzen dira, inauterietako igande goizeko desfilean. Mozorroen festa biribiltzeko, etxeko desfileetan izango da bihar eta etzi, biak ala biak 17:00etan. Konpartsan 200 pertsona aterako dira dantzatzen, eta laguntzaileekin 230 kide izango dira.
Gipuzkoako aisialdi talde zaharrena
1966an sortua, Boveda Gazte Taldea egungo Gipuzkoako aisialdi talde zaharrena da. Aurten 60 urte beteko ditu Trintxerpeko taldeak, eta begiraleak urteurren hori prestatzen ari dira jada. Soagek onartu du «harro» daudela herriko gazte taldeak sei hamarkada beteko dituelako, eta belaunaldiz belaunaldi bere jarduna mantendu egin delako. Soage 50. urteurrena prestatzen aritu zen, eta orain 60.ean murgildu da. «Belaunaldiz belaunaldi beti pentsatzen da: taldeak orain ondo funtzionatzen badu jende berriarekin iraungo al du? Argi dago baietz», hausnartu du begiraleak. Urtetik urtera Bovedako sentimendua transmititu nahi izan dute taldea osatu dutenek, eta hori da, hain zuzen, 60. urteurrenean aldarrikatuko dutena: «Boveda guztiona da, herrikoa eta herriarena, eta beti izango da».
Urteurreneko ospakizunak udako kanpamentuetan hasiko direla aurreratu du Soagek. Bovedak 50 urte inguru daramatza finkatuta Errioxako Montemediano de Cameros herrian, eta bertan izaten dira udaro, ekaina bukaeratik uztaila bukaerara. Horrez gain, 2026-2027 ikasturtean ekintza ezberdinak egingo dituzte urteurrena goratzeko. Boveda oso bizirik da.
