Energia eredu jasangarriaren bidean, urratsa Pasaian
Gipuzkoako Foru aldundiaren Jasangarritasun departamenduaren energia komunitateak dinamizatzeko lehen saioa hartu du Pasaiak.
Atzo arratsaldean egin zuten energia komunitatearen gaineko lehenengo saioa. Energia komunitatea sortzeko lehen saioa hartu zuen atzo Pasaiak Gipzukoako Foru Aldundiaren Jasangarritasun departamentuak eta Pasaiako Udalak sustatuta. San Pedroko udal aretoan egin zuten bilera, eta Monica Pedreira aldundiko Trantsizio Ekologikoko zuzendariak eta Iraitz Pazos Pasaiako Ingurumen saileko zinegotziak hartu zuten parte.
Pasaitarrek energia eredu jasangarriago, bidezkoago eta solidarioago baterantz urratsa egitea bilatzen dutela energia komunitateen bidez azaldu zuen Pedreirak, “Pasaiako herritarrek euren burua antolatu ahal izatea, beren energia berriztagarria sortzea, eta elektrizitate fakturan aurreztea ere bilatzen dugu”, eta pertsonak “trantsizio energetikoaren erdigunean” kokatzearen garrantzia nabarmen jarri zuen.
Lehen saioan, energia eta autokontsumoa izan zituzten hizpide, oinarrizko kontzeptuak jorratuta, baita energia komunitateen funtzionamendua eta onurak ere, ekonomiaren, gizartearen eta ingurumenaren ikuspegitik. Hurrengo saioak zehaztu dute; martxoaren 5ean (osteguna) eta 26an (osteguna) izango dira, 18:30ean hasita San Pedroko udal aretoan. Bi horietan, energia komunitatea bat osatzen duten funtsezko eragilez, finantzaketa aukerez eta garatu daitezkeen proiektuez ariko dira. Komunitatearen kudeaketa eta abian jartzea ere izango dute hizpide, eta hura sortzeko ibilbide orria finkatuko dute.
Gaur egun 67 energia komunitate daude martxan Gipuzkoako 59 udalerritan eta 10.000 familia baino gehiago biltzen dituzte. Helburua, 2027an udalerri guztiek gutxienez energia komunitate bat abian izatea da.
