Arditurriko meategien irteera berritu dute
Urtarrilean egin dituzte lanak, 52.500 euroko inbertsioarekin. Iaz 7.085 bisitari izan zituzten meatzeek.
Irudikoa da berritu den irteera. Oraintsu arte Arditurriko meategien sakoneko bisiten irteera itxita izan da, erabileragati, euri urengatik eta luizi batengatik zahartua eta kaltetua zegoelako. Oiartzungo Udalak azaldu du jada konpondu duela irteera hori, erabilgarri dela urtarrilean egin diren lanei esker. 52.500 euroko aurrekontua izan dute obrek; horren zati bat Edil Europako Garapen Eskualdeko Funtsetik iritsi da, eta beste bat Eusko Jaurlaritzako Erein diru laguntza lerrorik (landa eremuak sustatu eta garatzen laguntzeko laguntza da).
Udalak egindako lanen xehetasunak eman ditu: “Alde batetik, behetik gorako eskailerari hormigoizko mailak egin zaizkio lehendik zeuden bidearen egitura eta egurrezko trabesak oinarri, eta eskailera bazterrean eskubanda jarri da. Bestetik, irteera-atera iritsi aurreko zatiari LED argiteria ezarri zaio”. Euri ura jasotzeko sistema ere ezarri da, meategira urik sar ez dadin. Hormigoizko markoak margotu dira. “Lekuaren estetikan eta meategia ezagutzeko bisitaren esperientzian ahalik eta gutxien eragiteko asmoz burutu dira hobetze-lan horiek guztiak”.
7.085 bisitari iaz
Egindako lanen azalpenak emateaz aginera, Arditurrik 2025ean zenbakitan eman duenaren berri eman du udalak. Batetik adierazi du iaz 7.085 bisitarik baliatu zutela aukera erromatarren garaitik XX. mendearen bukaera aldera arte ustiatu ziren meatzeetako galeriak ezagutzeko; 2024ko bisitarien kopuruarekin alderatuta, %7,5eko hazkundea izan da.
