Podcast bat, denontzako mundu bat eraikitzeko bidean
Mindarako erabiltzaileek lehen eskutik kontatuko dute euren bizi ibilbidea 'Leku bat, mila istorio' podcastean. Sei atal izango ditu denera; bihar, elkartearen hamabosgarren urteurrenarekin batera lehenengoa zabalduko dute.
Mindara elkartearen podcastaren aurkezpena.Mindara elkartea Podcasta abiatuko du Mindara elkarteak: Leku bat, mila istorio. Horren lehen emankizuna bihar —larunbata— izango da. Elkartearen erabiltzaileak izango dira Mindararen iniziatiba berriaren protagonista, eta ikus-entzunezko sei saiotan zehar pertsona horien ikasketa eta lan ibilbidea azalduko dute, baita ibilbide pertsonala ere. Lehen pertsonan kontatuko dituzte benetako istorioak, elkarteko arduradunek azaldu dutenez: «Haztea, munduan leku bat bilatzea, erabakiak hartzea, eta norberaren bizi proiektuak beharrezko laguntzekin eraikitzea aipatzen duten istorioak dira».
Hilero argitaratuko dute kapitulu bat, eta lehenengoa data berezian zabalduko dute: Mindara elkartearen sorreraren 15. urteurrenarekin egingo du bat. Azken hori, urteurrena, izan da podcasta martxan jartzeko arrazoietako bat, baita erabiltzaileekin, haien familiekin eta komunitatearekin partekatzeko modu bat ere.
Hori horrela, familien arteko topaketa ere egingo dute bihar Mindararen egoitzan, «elkar ezagutzeko eta familien arteko harremanak sendotzeko gunea izango da eta jolasak eta askaria egingo ditugu», azaldu dute Mindarako arduradunek. Merchadising lerro berria ere zabalduko du elkarteak, Loratzen taldearen erabiltzaileek sortutako logotipo berezi batekin.
Sei atal, hilabetean bat
Elkarrizketak Olga Grande kazetariak dinamizatuko ditu, eta sei atal izango dira denera; bat hilabeteko. Begirada hurbila eta errespetua izango ditu oinarri podcastak, eta kapitulu bakoitzak bizi etapa bat jarriko du erdian: «Mindararekin izandako lehen harremanetik hasita, helduarora eta lan eremura heldu arteko erritmoen, esperientzien eta bideen aniztasuna erakutsiko dute».
Argi esan du elkarteak ez dutela helburu aniztasun funtzionala zer den azaltzea, «hura bizi dutenei entzutea baizik, gaitasunak, nahiak eta eskubideak agerian jarriz».
Leku bat, mila istorio Mindararen erabiltzaileek kontatutako podcasta da, adierazpenerako, hausnarketarako eta aldarrikapenerako espazioa, «aniztasunaz, giza eskubideez, autonomiaz eta parte hartze sozialaz hitz egiten da, benetako esperientziatik abiatuta». Grabaketa Mindararen egoitzaren hainbat aretotan egingo da, eta grabazioa bera nahiz edizioa Katiuskak estudioarekin elkarlanean egingo du elkarteak. Kapitulu gehienak euskaraz izango dira, gaztelaniazko azpitituluekin, eta zeinu hizkuntzaren interpretea izango dute Eskuaireren eskutik. Proiektuak Gipuzkoako Foru aldundiaren laguntza du, eta inguruko eragile sozialen parte hartzea jasoko du, gainera, «sareko lanari eta etorkizun inklusiboago baten eraikuntza kolektiboari balioa emateko».
Podcasta hainbat plataforma digitaletan eta sare sozialetan izango da eskuragarri. Sortutakoa ikusi eta entzutera deitu ditu Mindarak herritarrak, «pertsona guztiak ezberdinak garelako. Eta denok dugulako zerbait garrantzitsua esateko».
