Asteazkenean egingo dute otsaileko osoko bilkura
Urmendi haur eskola, industriaguneetako hondakinen bilketa eta Oiartzun tentsio handiko eremu izendatzeko eskaera izango dira, besteak beste, jorratuko dituzten gaiak.
Datorren asteazkenean (hilak 25) egingo dute otsaileko udal osoko bilkura, 18:00etan hasita. Zortzi gai izango dituzte hizpide, eta, Urmendi haur eskolaren gaia, industriaguneetako hondakinen bilketa eta tentsio handiko eremu izateko eskaera izango dira jorratuko dituzten gaien artean nabarmendu dituztenak.
Eusko Jaurlaritzak Oiartzungo Udal Ikastola Partzuergoa bere Haurreskolak Partzuergoan sartzeko eskaintza egin du, eta udalbatzarrean udalak horren harira egindako herri proposamena landuko dute.
Era berean, Oiartzungo Udaleko bi alderdiek 2025eko azaroan adostu moduan, aurrerantzean udalak bere gain hartuko du poligonoetako hondakinen bilketa “orain artean baino eraginkorragoa izan dadin birziklatze mailari dagokionez, baina errentagarriagoa ere ekonomikoki”. Alor horren inguruan ere mintzatuko dira saioan.
Gai zerrenda
- Aurreko batzarrari dagokion aktaren onarpena
- Oiartzungo Udal Ikastola Partzuergoari 2026 urteko ekarpena
- Haurreskolak Partzuergoa – Oiartzungo Udal Ikastola Partzuergoa: etorkizunerako aukeren proposamenari onarpena
- Oiartzungo Udala Garbitania Zero Zabor S.L.ren kide izateko erabakia eta partizipazioaren erosketa, eta bitarteko propioa izendatzeko proposamena
- Oiartzungo udalerria bizitegi merkatu tentsionatuko eremu deklaratzeko agiriak onartzea eta Jaurlaritzari eskaera igortzea
- Oiartzungo udal araubideko etxebizitza tasatuen eskatzaileen erregioa arautzen duen erregelamenduaren aldaketa
- Beste organoen jardueraren jarraipena
- Eskariak eta galderak
