Martxoaren 4an egingo du Arraztalok urteko batzar orokorra
Batzarrean landuko dituzten puntuen inguruan aritu ostean, hausnarketarako eta proposamenak egiteko aukera izango da hitzorduan.
Arraztalo Elkartek batzar orokorra egiten du urtero, eta 2026ko hitzordua martxoaren 4an izango dela jakinarazi dute, 18:00etan, Oiartzungo Udaletxeko Areto Nagusian. Hortaz, elkarteko bazkide, kolaboratzaile, laguntzaile eta erakunde publiko zein pribatuei topaketan parte hartzeko gonbidapena luzatu diete.
Arraztalok jakinarazi duenez, batzar hori urteko hitzordu nagusietako bat da, eta bertan elkartearen jardunaren balorazioa egingo badute ere, bereziki lan integrazio programaren bilakaera izango dute hizpide. Zehazki, programa horrek laneratze zailtasunak dituzten pertsonen gizarteratzea eta lan aukeren sorrera ditu ardatz, eta 2025ean egindako ibilbidea, lortutako emaitzak eta aurrean dituen erronkak aurkeztuko dituzte.
Era berean, Kontsumo Taldearen jardueraren berri ere emango dute, tokiko eta sasoiko ekoizpena sustatzeko egindako lanaren inguruko datuak partekatuz. Hots, 2025eko diru kontuak aurkeztu eta aztertuko dituzte.
Hona hemen batzarreko gai zerrenda:
- Aurreko batzar orokorreko aktaren irakurketa eta onarpena
- Lan integrazio programaren urteko bilakaera eta balorazioa
- Kontsumo Taldearen informazioa
- Sentsibilizazio ekintzen balorazioa
- 2025eko diru kontuen aurkezpena
- Norberak dakarrena
Arraztalok azpimarratu nahi izan du batzarra ez dela soilik urteko betebehar formal bat, baizik eta hausnarketarako eta proposamenak egiteko espazioa.
