Hiru finalerdi jokoan, eta hirurak poltsikora; orain, finalak
Asteburu biribila EPLEko pilotarientzat. Lanak bikain eginda, hiru finalera heldu dira errenteriarrak.
Jokin Bidezabal finalerdian, atzean Aranguren eta Zabaleta.EPLE Bikain aritu dira asteburuan EPLEko pilotariak, emaitzei erreparatu baino ez da behar. Hiru finalerdi, eta hirurak irabazi dituzte EPLEko pilotariek beste hainbeste ligetan, eta horrenbestez, finalerako txartelak lortu. Euskal Ligan Eskuz Binakako seniorretan derbia izan zen, EPLE eta Oiarperen artean, eta Eplekoak nagusitu ziren. Bidezabal —Urmeneta ordeztu zuen azken unean baja izanda— eta Aranguren 1-10, 10-3 eta 5-2 partzial egin da izan ziren garaiule. Oiarpeko Zabaleta eta Olaizek ez zieten errenteriarrei aukerarik eman lehen jokoan, erremate erakusketa egin zuen Zabaletak.
EPLEkoek, baina, buelta ematen asmatu zuten eta hurrengo bi jokoak seriotasunez jokatu zituzten, jokoa atzealdera eramanda. 2-1 irabazita finalerako txartela lortu dute EPLEkoek eta datorren denboraldia Ohorezko Mailan ariko dira Euskal Ligan.
Banakako Trinketeko Gipuzkoako Txapelketako finalerdietan lehen mailan Taberna eta Chiapuso garaile, eta beraz, finalean aurkari izango dira EPLEKo biak. Tabernak Gurutzealde 40-15 irabazi zuen; Chiapusok gehiago sufritu zuen garaipena lortzeko. Hernaniko Jara aurretik izan zen partida osoan eta 34-28ra ere heldu zen. Une horretan baina, Chiapusok aldeko 1-12 partzial bat lortu zuen eta garaipena eman zion partidara buelta emanda.
Lander Caballero EPLEko Kadete pilotariak, bestalde, asteburu betea izan du. Euskal Ligako kadeteen finalerdian 22-14 galdu zuen Behar Zana Klubarekin —zedituta jokatzen ari da bertan EPLEkoa—. Larunbatean, berriz, txapeldunorde izan zen Lesakan jokatutako bikotekako esku pilotako finaletan. Partida gogorra eta ikusgarria oso. 18-17 galdu zuten partida gogorra jokatuta. Urratsez urrats bidea egiten ari da Caballero.
