Liburu aurkezpena eta ipuin kontaketa Lekuona Fabrikan, ostegunean
Guzman Villardon Preciadok 'Diario de lo cotidiano' poesia liburua aurkeztuko du.
Bi literatur ekitaldi izango dira ostegunean Lekuona Fabrikan. Horietako lehena, ipuin kontaketa, Martxoaren 8aren harira antolatu dute, Mundua aldatu zuten emakumeak izenburupean. Adin guztietako entzuleei begirakoa, 17:30ean egingo dute eta parte hartzeko izena eman beharko da, Lekuona Fabrikan edo Aldakoenean, 943 44 96 35 telefono zenbakira deituta, edo Whatsapp bidez 647 67 34 51 zenbakian.
Bigarren ekitaldia poesia liburuaren aurkezpena da. Guzman Villardon Preciadok Diario de lo cotidiano aurkeztuko du. Gaztelaniaz izango da ekitaldia, eta poemen bidez, Villardonek eguneroko gertaerak kontatuko ditu. Maitasuna, heriotza bidegabeen salaketa, indarkeria matxistak hil duen emakumea, edo ia zuzenean ikusitako migrante baten heriotza aurkituko ditu irakurleak liburuaren orrialdeetan.
Ekintza horiez gain, hilero bezala, haur, gazte eta helduentzat hainbat jardueratan murgiltzeko aukera egongo da Lekuona Fabrikan zein Aldakoenea liburutegian (Beraun): ipuin kontaketa familian (martxoak 7), Liburu Baby Kluba (martxoak 12 eta 17), txikientzako ipuin kontaketa (martxoak 26), testu feministak (martxoak 12) eta irakurketa erraza (hainbat data).
