Elizalde ikastetxea "erabat" eraberritzeko aurreproiektua landu dute
Sei urteko obra lanak eta bost milioi euroko aurrekontua aurreikusi dituzte. Datozen egunetan jasoko dute diru laguntzaren ebazpena.
Elizalde herri eskolaren beharrei erantzun asmoz, Oiartzungo Udalak ikastetxea “erabat” eraberritzeko aurreproiektua landu zuen 2025eko udan eskolako komunitateko kideekin elkarlanean. Elizalde Life Berri modura izendatu zuten prozesua, eta horren aurrean Joana Mendiburu Garaiar Oiartzungo alkateak azaldu du hezkuntza konpetentzia Eusko Jaurlaritzarena den arren, “beharra ikusita”, egitasmoa hartu zuela udalak.
Aurreproiektuan lanak sei urtean egitea eta bost milioi euroko aurrekontua aurreikusi dituzte. Mendiburu: “Aurrekontua handia izanik, Oiartzungo Udalak txostena Europako Life programaren diru laguntza deialdira aurkeztu zuen 2025eko udan, eta ebazpena aurki, datozen egunetan jasotzea espero da”.
Zehazki, Elizalde Life Berri aurreproiektuaren helburua ikastetxearen eraikinaren eraberritze integrala eraberritzea da, eta, azaldu dutenez, azterketa teknikoak bi alderdi nagusi ditu: eraikinari berari eta hezkuntza jardunari dagozkionak. Lehen atalean alderdi energetikoa landu dute batez ere “eraikina hobetzeko eta gaur egungo legediak ere hala eskatzen duelako”. Era berean, bigarrenaren oinarria pedagogia da, ikastetxea metodologia berrietara egokitzea eta eraikinak behar pedagogikoei erantzutea baita xedea.
Hots, azpimarratu dute “zaharkituta” dauden eremuak berritu nahi dituztela, batez ere HH eta DBHko eremuak.
Elizalde Life Berri, egindako inbertsioen osagarri
Mendiburu: “Elizalde herri eskola eraberritzeko Elizalde Life Berri aurreproiektua egin eta Europako funtsetara aurkeztu izana udala legegintzaldi honetan aipatutako ikastetxean egiten ari den inbertsioan osagarri da”. Horretaz gain, azaldu dute mantenu lanez gain, azken bizpahiru urteetako inbertsioak kanpoaldeko eremuan egin direla, “haurren beharrak erdigunean jartzen dituen patio inklusibo eta hezigarri baten birmoldaketan”, hain zuzen.
Bide horretan, beraz, Elizaldeko guraso elkartea eta udala eskolako jolaslekua biziberritzeko prozesu integrala egiten ari dira, ikastetxearen kanpoaldeko espazioa eskolako proiektu pedagogikoaren parte bilakatu nahi baitute, bertako eta herriko haur guztiei euren txokoa eskainiko dien patioa sortuz.
Proiektu hori zenbait fasetan ari dira egiten: lehenengoan kantxak txikitu eta naturgunea handitu zituzten, bigarrenean kirol gunea berrantolatu eta margotu zuten, eta, gero, HHko naturgunea sortu zuten. Gainera, ikastetxeko harmailak goxatzeko eta erabilera handitzeko proiektua ere badago.
Azkenik, gehitu dute eraikinaren barrualdean ere egin nahi dituztela inbertsioak; hala nola, leihoetan, argiterian edota IKT sisteman.
Mantenu lanez gain, udalak 385.000 euro inbertitu ditu Elizalde herri eskolan azken legegintzaldian.
