"Gure garaipenen ondorioz batzuek haien pribilegioak kolokan ikusten dituzte"
Matxoaren 8ko manifestazio handia egin dute Lezon. Irakurketan, hurbileko eta urruneko borroka zuzen eta zeharkakoak aipatu dituzte.
Jendetsua. Oso jendetsua. Halakoa izan da Martxoaren 8ko mobilizazioa Lezon. Gaur baita Emakumeen Eguna. Manifestazioa egin dute ehunka lezoarrek Gurutze Santuaren plazan hasi eta Karlos Saldise plazaraino. Hasieran irakurri dute eguna ezaugarritzeko komunikatua; Saldisen, musika, dantza eta habanerak. Lezoko Mugimendu Feministak antolatu du eguerdiko mobilizazioa. Martxoaren 8aren harira badira ekitaldi gehiago Lezon udalak eta herriko eragileek antolatuak, eta horiek beheko zerrendan ikus daitezke.
Bandera moreak (batzuk etxekoak, besteak antolatzaileek emandakoak), M8 elkar zainduz Lezo leloarekin zapi moreak, pankartak, trikitilariak, gazteak, adinekoak, haurrak… Izaera berezikoa izan da Lezoko mobilizazioa. “Ez dugu mundu honetan gure lekua egin nahi, baizik era beste mundu bat irudikatzen dugu”, esan dute manifestazioa hasi aurretik irakurketa egin dutenek: “Klase zapalduentzat garai zailak dira, Euskal Herritik hasi eta nazioarteko beste hamaika txokotaraino. Gerra, desberdinkeria eta askotariko indarkeria nagusi diren testuinguru bete-betean iritsi gara Martxoaren 8ra. Testuinguru honetan gorputz jakin batzuk dira lehen konkista territorio, eta hori salatu nahi dugu. Borroka internazionalista ere gure borroka da. Hemendik gure babesa Palestina, Venezuela, Mendebaldeko Sahara, Iran eta Kurdistango herriei. Erresistentzian eta borrokan ari diren feministei”.
Klase zapalduen adibideak eman dituzte, azalduz etxebizitzarako sarbidea pertsona jakin batzuk dutela, baliorik gabeko lanetan emakumeak dabiltzala, edota eskubideen jabe ez dela pertsona oro: “Klase zapalduak are zapalduagoak daude egun. Eta gizartea eskuinerako bidea egiten…”. Baina, Euskal Herriko militante feministen azken urteetako borrokei balioa eman nahi izan diete plazako ekitaldian, “bagara subjektu antifaxista. Gure garaipenen ondorioz batzuek haien pribilegioak kolokan ikusten dituzte. Horregatik da garrantzitsua gaur kalera ateratzea. Gure boteretzeak ekarri du euren desboteretzea”.
Emakumeen eta genero disidenteen gorputzak “jo puntuan” daudela adierazi dute, haiek jasaten duten indarkeriari erreferentzia eginez. “Bazterrean jarraitzen dugu, eta erasoak jasaten jarraitzen dugu. Feminismoa urrunegi joan denaren ideia zabaldu dela jakitun gara. Horregatik, gaurko eguna, askotariko subjektuen arteko borroka eguna da. Aliantzen beharra dugu, mugimendu antiarrazistarekin eta transfeministarekin eskutik joan behar dugu”.
Martxo osoa kaleak hartzeko hilabetea izango dela adierazi dute mugimendu feministako kideek. Hala, adierazi dute martxoaren 21eko Arrazakeriaren Eguna, martxoaren 30eko Etxeko eta Zaintza Langileen Eguna, edo hilaren 31ko Trans Ikusgarritasunaren Eguna ere aldarrikapenerako eta borrokarako egunak direla. “Bada zer borrokatu. Dominazio sistemen aurrean beste mundu bat eraiki dezagun”.
Irakurketa egin ondoren, herria alderik alde zeharkatu du manifestazioa, Saldisen bukatzeko. Jarraian, horren guztiaren hainbat irudi eta bideoa.
Martxoak 8 Lezon. Ekitaldiak.
Gaur, Emakumeen Eguna.
- 19:30ean, Gezala Auditoriumean, Esne berriketan bertso saio literarioa Uxue Alberdi eta Amoranterekin.
Hilak 11, asteazkena
- 18:00etan, Kultura Aretoan, Lezoko Berdintasun Kontseiluaren aurkezpena.
Hilak 13, ostirala
- 19:30ean, Gezala Auditoriumean, Ongi etorri helduentzat ipuin kontaketa.
Hilak 15, igandea
- 19:30ean, Gezala Auditoriumean, Adelaida bikotearen kontzertua.
Hilak 25, asteazkena
- 18:00etan, Kultura Aretoan, Salaketatik harago: presioak, aukerak eta biktimen erabakiak hitzaldia.
