Lezok Berdintasun Kontseilua izango du
Martxoaren 8ko egitarauaren barruan, urtebeteko sortze prozesua izan duen mahaiaren aurkezpena hilaren 11n egingo dute.
Iazko Martxoaren 8ko mobilizazioaren une bat. Lezoko Udalak eta Lezoko Berdintasun Kontseilua osatzeko prozesuan parte hartu duten eragile eta herritarrek Martxoaren 8aren harirako egitaraua osatu, eta aurkeztu dute. Emakumeen Egunetik harago doa ekitaldien zerrenda. Jardueren artean nabarmentzekoa da jada Lezoko Berdintasun Kontseilua osatzeko bidea bukatu dela, eta hilaren 11n (osteguna) aurkeztuko dutela jendaurrean mahai hori, 18:00etan, Kultura Aretoan. Urtebeteko sortze prozesua izan du kontseiluak. Beheko zerrenda, Martxoaren 8ko ekitaldiak zerrenda modura.
Kontseilua sortzeko bidean udalak eta herriko hainbat talde zein norbanakok parte hartu dute. Helburuak: berdintasunaren alde apustu egiten duten pertsonen eta eragile sozialen sarea sortzea; emakumeen parte hartzea sustatzea; emakumeen parte hartze sozial eta politikoaren defizitari aurre egitea eta euren herritartasun aktiboa indartzea, talde feministen eta emakume taldeen lanaren aitortza egiteko. “Kontseiluan parte hartzera dei egingo zaie herritarrei martxoaren 11ko agerraldian, ahalik eta ahots gehien izan ditzan egiturak”.
Kontseiluaren aurkezpenaz gainera, Martxoaren 8ko manifestazioa izango da Emakumeen Egunaren harira antolatutakoetatik kaleko ekintza nagusiena. 12:00etan irtengo da martxa Gurutze Santuaren plazatik. Bestelakoan, kultur ekitaldiak txertatu dituzte egitarauaren barruan, tartean delarik hilaren 7ko bertso bazkari feminista. Hitzaldiak ere izango dira, eta Iruntzen Lezoko Emakume Taldeak haurrei eta gazteei begirako sentsibilizazio saioak egingo ditu ludotekako eta Kuadrillategiko haur eta gazteekin.
“Berdintasun politikek lehentasunezko izaera dute udal agendan”, nabarmendu du udalak, “berdintasunetik elkar zainduz gero bizikidetza hobea eta herri justuagoa lortuko baitugu. Horretarako, urte osoan zehar lanean jarraituko du emakumeen eta gizonen arteko benetako berdintasuna lortzeko”. Bestalde, Berdintasun Kontseilua osatzeko prozesuan parte hartu duten eragile eta norbanakoen taldeak herritarren inplikazioa nabarmendu nahi izan du udalak, “egitaraua elkarlanetik eta herri ekimenetik eraiki baita”.
Martxoak 8 Lezon. Ekitaldiak.
Hilak 4, asteazkena
- 18:00etan, ludotekan, 4-11 urtekoekin, sentsibilizazio saioa Iruntzen Lezoko Emakume Taldearekin
Hilak 6, ostirala
- 19:00etan, Kuadrillategiko gazteekin, sentsibilizazio saioa Iruntzen Lezoko Emakume Taldearekin.
- 21:30ean, Ibai Ondon, bertso afari feminista Ekhiñe Zapiain eta Amaia Agirrerekin. Sarrerak 20 euroan Txingurrin eta Tiñelun.
Hilak 7, larunbata
- 12:00etan, Koldobike Gezala pilotalekuan, emakumeen esku pilota erakustaldia (Maialen Pikabearekin eta Irati Lobeterekin).
- 19:30ean, Gezala Auditoriumean, Ez gara alferrik pasako dokumentala.
Hilak 8, Emakumeen Eguna.
- 12:00etan, manifestazioa Gurutze Santuaren plazatik.
- 19:30ean, Gezala Auditoriumean, Esne berriketan bertso saio literarioa Uxue Alberdi eta Amoranterekin.
Hilak 11, asteazkena
- 18:00etan, Kultura Aretoan, Lezoko Berdintasun Kontseiluaren aurkezpena.
Hilak 13, ostirala
- 19:30ean, Gezala Auditoriumean, Ongi etorri helduentzat ipuin kontaketa.
Hilak 15, igandea
- 19:30ean, Gezala Auditoriumean, Adelaida bikotearen kontzertua.
Hilak 25, asteazkena
- 18:00etan, Kultura Aretoan, Salaketatik harago: presioak, aukerak eta biktimen erabakiak hitzaldia.
