Hiri barruko garraio zerbitzuaren luzapenarekin kezka azaldu du PSE-EEk
Herri barruko garraioarena ez dela udalak behartuta egindako luzapen bakarra gaineratu du Isaac Palenciak, "azken urteotan tresna bera baliatu du kiroldegietan eta kale garbiketa zerbitzuetan".
PSE-EEren agerraldia garraio zerbitzuaren luzapenaren gainekoa. Hiri barruko garraio zerbitzuarentzat onartutako behartutako luzapenak kezkatuta du alderdi sozialista. Hala adierazi zuen atzo Isaac Palencia eledunak, Almudena de La Torre eta Alberto Muñagorri zinegotziekin batera egindako agerraldian. Haren iritzirako, “EH Bilduren aurreikuspen, planifikazio eta kudeaketa arazo larria” dago neurriaren atzean:” behartutako luzapenak bukatutako kontratua indarrez mantentzea suposatzen du udalak ez duelako garaiz prestatu kontratu berria”.
Herri barruko garraioarena ez dela udalak behartuta egindako luzapen bakarra gaineratu du Palenciak, “azken urteotan tresna bera baliatu du kiroldegietan eta kale garbiketa zerbitzuetan. Ez dira beraz isolatutako kontuak, udalerriko zerbitzu publiko garrantzitsuenei eragiten dien funtzionatzeko modua baizik”.
Erabakiak ondorioak izango dituela esan du, bestalde, sozialistak, “Errenteriak hobekuntzak egiteko aukera galduko du, ordutegiak eguneratzea egungo errealitatera egokitzeko, maiztasuna handitu, eta autobus lineak berriro diseinatu eta ugaritzea, besteak beste. Agintaldi Planean aurten flota elektrifikatzeko milioi bat euro bideratzea proposatzen zen, eta diru kopuru hori ez da inoiz txartatu udal aurrekontuan”.
Larritzat jo du egoera, eta horrenbestez, “gardentasuna” eta “kudeaketaren arduradun politikoak dagokion ardura bere gain hartzea” eskatu du PSE-EEk.
