50. urteurreneko Pasaia-Lezo Lizeoaren Eguna, igandean
Ikastolaren egunean emanaldiak eta bazkariak izango dira. Ekainaren 6an egingo dute Lizeoaren sorreraren 50. urteurreneko ekitaldi nagusia.
Iazko Lizeo Egunaren une bat.Pasaia-Lezo Lizeoa Pasaia-Lezo Lizeoaren komunitateak bilgunerako eguna izango du igandekoa. Pasaia-Lezo Lizeoaren Egunaren barruko ekitaldiak egingo dituzte ikastolak Donibanen duen egoitzan nagusian. Testuinguru berezi batean dator aurtengo eguna, ordea: 50 urte beteko ditu Lezoko eta Pasaiako barrutietako ikastolak bateratu zituen hezkuntza proiektuak. Hortaz, ohiko ospakizun eta aitortza giroaz gainera, mende erdiarenak ere presentzia izango du igandeko festan.
Igandeko egitarauari dagokionez, 10:00etan hasiko dira jarduerak. Ordu horretatik 11:00etara egunarekin bat egin dutenei harrera egingo diete dantzariek, eta ikastolako hainbat eremutan ezarriko diren kafe eta opil postuetan hamaiketakoa egiteko aukera izanen dute. 11:00etan hasiko dira ikasleen dantza eta musika emanaldia, eta 12:00ak aldera, omenaldien txanda hasiko da: 1990eko belaunaldikoei aitortza egingo diete, baita Batxilergoko Bigarren Mailan daudenei ere (azken ikasturtea dute Lizeoan); gainera, erretiroa hartuko duten langileei agur komunitarioa emateko parada izanen da.
Emanaldien eta omenaldien ondoren, bazkariak. 13:30ean hasiko dira otorduak Donibaneko egoitza nagusiko jangelan, lehenik haurrena (bazkaria bukatutakoan haurtzaindegi zerbitzua eta jolasak izango dira), eta 14:30ean helduena (bukatzean, bingo musikatua).
50. urteurrena
Pausoz pauso 50 urte lelopean, Pasaia-Lezo Lizeoaren sorreraren mende erdiaren barruko ospakizun ekitaldiak izango dira urtean zehar. Hainbat dira ikastetxearen komunitatea osatzen dutenek antolatuko dituzten jarduerak, baina jada Lizeoak aurreratu du ekainaren 6an izango dela nagusiena. Hala, ospakizun jai izaera izango du ekainaren 6ko horrek, eta ekitaldi nagusiaz gainera, bazkari erraldoia, musika auzolan adierazpenak eta bestelakoak izango dira. Horren egitarau zehatza eta bazkarirako txartelak lortzeko argibideak udaberriko oporretatik bueltan jakinaraziko dituztela azaldu dute ikastolatik.
II. Soziolinguistika Jardunaldia
Pasaia-Lezo Lizeoko Batxilergoko Lehen Mailako ikasleek euskararen erabileraren gaineko ikerketa lana egin dute ikasturtean zehar, bai ikastolan bertan, zein kalean. Egindako lanketaren, ateratako ondorioen, eta ondorio horien araberako interbentzioen gaineko azalpenak II Soziolinguistika Jardunaldian emango dituzte ikasleek, hilaren 24ko 17:30ean (asteartea) Donibaneko Juanba Berasategi aretoan egingo duten saioan. Ekitaldi irekia da, edonor joan daiteke
Nik ere normal hitz egiten dut unitatearen barruan egin dute Batxilergoko Lehen Mailako ikasleek lanketa, Soziolingustika Klusterraren aholkularitzarekin. Euskararen erabileraren gaineko ikerketa azaroan abiatu zuten. “Ibilbide honetan, ikasleak euskaldun hezteko ahaleginean urrats bat egin, eta ikasleak eurak jarri ditugu hausnartzen eta ikertzen euskararen egoeraz, kaleko inertzietaz eta euskaraz gehiago egiteko esku-hartzeetaz, Gogor aritu dira lanean, eta martxoaren 24ko jardunaldian harro plazaratuko ditugu egindakoak”, azaldu dute Lizeotik.
