Prestatu elastikoak, zartaginak eta erratzak; hemen dira Lezoko Herri Olinpiadak
Asteburuan hasiko dira aro berriko Lezoko Herri Olinpiadak. Ostiralean taldeen aurkezpena egingo dute, eta larunbatean dira lehen probak.
Lezoko Herri Olinpiaden aro berria hemen da. 1990ko hamarkadaren hasieran ereindako horrek segida izango du asteburu honetatik aurrera. Herritarren arteko elkar ezagutza, kohesioa, herrigintza eta euskararen erabilera sustatzea dago egitasmoaren oinarrian, nola ez, ongi pasatzen. Irribarre batekin. Aurten berreskuratutako Lezoko Herri Olinpiadak lau egunekoak izango dira, lehena larunbatekoa; aurretik, bihar (ostirala), taldeen aurkezpena egingo dute 20:30ean pintxo-pote giroan Tiñelu ondoko plazan edo Azkena taberna ondoko arkupetan (eguraldi txarrarekin).
Arrakasta. Lezoko Komite Olinpikoak hala definitu du aro berriko lehen deialdia. Izan ere, hamar taldek eman dute izena jada parte hartzeko, 100 pertsona mugiaraziko dituzte Herri Olinpiadek. Euren berri ostiraleko aurkezpenean emango badute ere, egitasmoaren sare sozialetan jada ikus daitezke taldeak, eta taldekideak. Taldeen artean gehienak gazteenak badira ere, badira 199oko hamarkada horretan izan zirenetako batzuk, eta besteren baten esperoan daude. Honakoak, orain artean apuntatu diren taldeak: Sugarrak, Bidea Gara, Perretxikuak, Al-Dekhflipau, Beatzi Gau, Errefusa, Pronponpon, 2 Kaña, Kosto de Marfil, eta Lez Go!.
Lehen egun olinpikoa, aurkezpenaren ondoren, larunbatekoa (hilaren 14koa) izango da. 10:00etan Koldobike Gezala pilotalekuan agertzeko eskatu diete momentuz izena emana duten hamar taldeei. Elastikoak, bi zartagin, eta partaide bakoitzeko erratz bana eramateko eskatu diete. Izan ere, Komite Olinpikoko kideek aurrez taldeei ez diete esan zer proba egin beharko dituzten, sorpresa da hori. Probak egiteko lekura iritsi, eta horiekin aurrez aurre topatuko dira taldeak aurretik deus ere jakin gabe.
Larunbatekoa lau eguneko olinpiaden lehena da. Hurrengo jardunaldiak apirilaren 25ean, maiatzaren 16an, eta ekainaren 27an izango dira. Ekaineko hori final handia da, eta hara ordura arte punturik gehien lortu dituzten lau taldeak iritsiko dira.
