Korrika pasatzen denerako, Elizaldekoak prest
Hilaren 23an bi kilometro inguruko ibilbidea egingo dute herrian zehar; maila bakoitzak 500 metro inguru egingo ditu lekukoarekin.
Prest da Euskal Herri osoa Korrikarako. Oiartzuarrak prest dira, eta baita Elizalde Institutuko ikasle zein irakasleak ere. Hori horrela, jakinarazi dute hilaren 23an beroketa lanekin hasiko direla, eta 12:30etatik 14:30ak aldera arte herrian zehar prestatu duten ibilbide bat egingo dutela.
Maila bakoitzeko pare bat lekuko eramaile izango dituzte, eta lekukoak, ohi modura, mezu sekretu bat izango du. Orotara bi kilometroren bueltan egingo dituzte, eta maila bakoitzak, gutxi gora behera, 500 metro inguru egingo ditu. Maila guztiak batera egingo du bidea, baina gela bakoitzeko ordezkari bana aukeratuko dute dagokion metroetan lekukoa eraman dezan.
Hartara, dagoeneko aurreratu dute egun horretan lekukoa eramaten lehenak Ortzadar gelako ikasleak izango direla. Eskolako patiotik atera, eta Garmendia okindegi aurretik barrena Tronpeoko maldaren hasieraraino joango dira. Han DBH 4ko ikasleek hartuko dute lekukoa, eta hilerrian barrena Pikabeneko biribilguneraino joango dira.
Horiek DBH3koei pasako diete lekukoa, eta Ormazabal aparkaleku pareraino joango dira. DBH2koak izango dituzte zain bertan, eta Elorrondo kalean gora segi eta Irubide parean ezkerrera hartuko dute, Elizalde aurretik, maldan gora Doneztebe plazaraino.
Plaza zeharkatu, eta Aialde kalean behera Arraskuelarre kale hasieran izango dituzte zain DBH1ekoak. Hauek izango dira azken lekuko eramaileak, eta eskolako kideak atzetik dituztelarik eskolaraino eramango dute lekukoa.
Gauzak horrela, hilaren 24ko goizaldean 24. Korrika pasatzen denerako prest izango dira Elizaldeko DBHko ikasle, irakasle zein bestelako kideak. Elizalden ere, euskara gara lelopean ospatuko dute Korrikaren iritsiera, animazioa zein musika lagun dituztela.
