Gutxieneko soldata bertan erabaki, lan eta bizi baldintzak duintzeko
Eskualdeko manifestazioa egin dute arratsaldean Errenteria-Oreretan. Oso jendetsua izan da, eta esanahiz beterikoa.
Oarsoaldeko greba orokorraren azken ekitaldia, eta une berean jende gehien batu duena, Errenteria-Oreretan egin dute. 18:30ean hasita milaka lagun batu dituen eskualdeko manifestazioa abiatu da Herriko Plazatik. Herri osoari bira eman dio, eta bidean, bi toki esanguratsutan izaera are handiagoa eman diote martxari: Jesusen Bihotza adinekoen egoitzaren ondoan (Matxaingo biribilgunean) greban diren bertako langileak elkartu dira mobilizaziora; Papresan, borrokaldian diren bertako langileek beste bultzada bat eman diote martxari; Sanmarkoseneko beharginek ere euren aldarria ekarri dute. Gamon Zumardian bukatu da manifestazioa.
ELAk eta LABek bultzatu dute gaurko protesta eguna, eta haiei batu zaizkie ESK, Steilas, EHNE-Etxalde eta Hiru sindikatuak. Ideia bakarra dago grebaren atzean, sindikalismoari erabat lotutakoa: Arabak, Bizkaiak, Gipuzkoak eta Nafarroak beren gutxieneko soldata propioa izatea, eta 1.500 eurokoa izatea. “Gutxieneko soldata hori hemen erabakitzeak ehunka mila langilerengan eragina izango du, baita gu guztion bizitzetan ere. Gaur ate handi bat zabaldu dugu. Segi dezagun borrokan”, esan dute gaurko manifestazioan: “Indar honekin garaipen berriak berehala helduko dira”.
Gora, gora, gora, langileen borroka!; Hemen bizi, hemen erabaki; Gaur greba orokorra; Borroka da bide bakarra; edo Gutxieneko soldata, hemen erabaki izan dira mobilizazioan zehar gehien oihukatu diren leloak. Gazteak, helduak, adinekoak… Askotariko partaideak izan ditu Oarsoaldeko lau herrietako biztanleak bildu dituen segizio handiak. Horren dimentsioaren neurria hartzeko datu bat: Errenteria-Oreretako Nafarroa etorbideko tarte osoa, Iztietatik Matxaineraino, bete du. LABek egin duen kontaketaren arabera 3.500 pertsonak parte hartu dute.
Gamon Zumardian bukatu da martxa. Udaletxeko maldatik zabalgunera sartzeko 10 bat minutu behar izan dituzte partaideek. Gazte batek eta pentsiodun batek hitz egin dute. Haienak izan dira gaurko azken hitzak. Zorionak eman dizkiete egun osoan zehar piketeetan, kalean izan diren ekintzetan, kotxe-karabanetan, edo bestelakoetan parte hartu duten grebalariei, eta gogoan izan dituzte greba egiterik ezin izan duten horiek.
Testuinguru orokorra eman diote gaurkoari, esanaz, sistemak aberastasunaren kontzentrazioa handitzen duela, eta horrek eskubideak ukatzen dizkiola langile klaseari, “gero eta egoera prekarioagoan bizi da langilea. Sistemak bereziki kolpatzen ditu emakumeak eta migratutako pertsonak, pertsona arrazializatuak, gazteak, aniztasun funtzionala dutenak, eta sexu genero disidenteak”. Eskubide urraketa horien artetik, soldata arrakalarena nabarmendu dute, “horregatik garrantzizkoa da hemen erabakitzea gutxieneko soldata 1.500 eurokoa izatea, aberastasuna banatuz justizia sozialaren bidetik. Hori lortu arte borrokatuko gara”. Prekarietatearen zabaltzeak langileen osasunean, edo harreman sozial eta laboraletan eragina duela azaldu dute, “bizitza duinak eraikitzeko dituzten aukerak murritzak dira”. Izuari, “boterea dutenek sortu nahi diguten beldurrari” aurre egitera deitu dute, eta horretarako antolaketaren beharra azaldu dute, “horrela egiten diegu aurre boteredunei, zapaldu nahi gaituztenei: borrokan”.
Jarraian Ximun Leturia Letek manifestazioaren egin dituen argazkiak, eta bideoak.
