"Gutxieneko soldata lortu arte borrokan jarraituko dugu"
Oiartzunen manifestazioa egin dute arratsaldean greba orokorraren azken ekitaldi bezala. Ehunka lagun elkartu dira.
Oiartzunen ere gutxieneko soldata propioaren eta bizitza duinen alde egin dute. Egun osoko greba orokorreko azken ekitaldia egin dute 18:00etan hasita, manifestazioa. Done Eztebe plazan hasi eta bukatu da. Ehunka lagunek bat egin dute eguneko azken mobilizazioarekin. “Miseriazko soldatak ez ditu inork nahi. Horregatik da garrantzitsua gutxieneko soldatak hemen erabaki, eta ezartzea. Lortu arte borrokan jarraituko dugu”, esan dute azken irakurketan.
ELAk eta LABek bultzatu dute gaurko protesta eguna, eta haiei batu zaizkie ESK, Steilas, EHNE-Etxalde eta Hiru sindikatuak. Ideia bakarra dago grebaren atzean, sindikalismoari erabat lotutakoa: Arabak, Bizkaiak, Gipuzkoak eta Nafarroak beren gutxieneko soldata propioa izatea, eta 1.500 eurokoa izatea. “Gutxieneko soldata hori hemen erabakitzea ehunka mila langilerengan eragina izango du, baita gu guztion bizitzetan ere. Gaur ate handi bat zabaldu dugu. Segi dezagun borrokan”, esan dute gaurko manifestazioan: “Gora langileen borroka!”.
Hizlariek adierazi dute patronalak eta agintari politikoek itxi nahi dituzten ateak irekitzeko eguna izan dela gaurkoa. “Soldatek erosahalmena galdu dute, eta prezioek goraka jarraitzen dute”. Adierazi dute gutxieneko soldata propioa edukitzea justizia soziala dela; izan ere, “pobrezia eta prekarietatea zabaltzen ari dira”, eta horrek eragin zuzena du langileen osasunean, harreman sozialetan, eta lanari lotutakoetan. “Borrokarako prest” agertu da Oiartzun, eta mundu berri duin baten aldarria egin du.
“Borrokan ikasi dugu, gainera, begirada gehiago zabaltzen”, esan dute plazan hitza hartu dutenek: “Badirelako langile batzuk, greba egiterik izan ez dutenak edo oztopoak izan dituztenak egoera administratibo irregularrean daudelako, gelditu ezin duten zaintzan ari direlako, edo bere bizitza arriskuan jartzen delako. Haiengatik eta haiekin batera ere egin dugu gaur greba”. Gaurko gerba orokorrean indar gehien izan duen arloa gutxieneko soldatarena izan bada ere, borrokarako beste hamaika arrazoi daudela baietsi dute, hala nola etxebizitzaren prezioa, zerbitzu publikoen ahultzea, pentsio eta soldatetako genero arrakala, krisi ekosoziala, eskuin muturraren gorakada… “Bakarrik eta beldurtuta nahi gaituzten horiei mezu garbia eman nahi diegu: borroka egiteko prest gaude”.
Jarraian, Allende Arnaiz Garmendiak atera dituen irudiak eta bideoa:
