Tentsio uneak, zaurituak eta atxilotu bat
Niessen merkatalgunera helduta izan da lehen tentsio unea. Ertzaintzaren patruila, gutxienez sei, agertu dira eta ziztu bizian atera dira autoetatik eta merkatalguneko sarbidera jo.
Greba orokiorarren aldeko pankarta bat Nafarroa etorbidean errepidea mozten. Herriko Plazan bildu dira piketeak 09:00etan eta Errenteria-Orereta Erdialdean barrena ibili dira informazioa zabaltzen. Saltoki eta taberna gehien-gehienak itxita ziren, baina batzuk zabalik: horien aurrean jarrita, informazio zabaldu dute piketeek, greba eguna dela-eta komertzioa ixteko eskatzeko. Lasai abiatu dira hitzartutako puntutik bildutakoak, 60 bat kide adin ezberdinetakoak. Greba giroa sumatzen zen kaleetan. Gaur greba orokorra, gaur greba eguna da oihuak entzun dira.
Gaurkoa ez zela ohiko eguna erakustea zuten helburu piketeetako kideek, eta agerian jarri dute goizeko lehen orduetatik. Piketeek poliziaren jarrera salatu dute, ordea: “Gure informatzeko lana oztopatzen saiatu dira, gogor oldartu zaizkigu, baina hala ere bete dugu gure egitekoa, zabalik ziren saltokiei esatea gaur greba eguna zela, pertsiana ixtea tokatzen zela guztiontzat gutxieneko soldata exijitzeko”.
Niessen merkatalgunera helduta izan da lehen tentsio unea. Ertzaintzaren sei patruila gutxienez agertu dira, eta ziztu bizian atera dira agenteak autoetatik eta merkatalguneko sarbidera jo. Sartu bezala, bertatik pasatzen ari ziren eta piketeekin zerikusirik ez zuten hiru gazteri motxilak miatu dizkiete. Tentsioa apur bat jaitsi bada ere, hamar minutu baino gutxiagora iritsi da unerik tentsuena. Gaurkoa greba eguna zela zioen pankarta zabaldu dute Nafarroa etorbidean errepidean alderik alde. Handik gutxira azaldu dira berriro Ertzaintzaren sei patruila eta furgoneta bat gutxienez, eta piketeetako hainbat kide identifikatzen hasi dira. Ika-mikaren bat tartean, piketeei oldartu eta hainbat lagun lurrera bota dituzte, eta beste hainbeste borraz kolpatu. Une horretan atxilotu dute piketeetan zen kideetako bat, lurrera bota, bertan zela eskuburdinak jarri eta patruiletako batean sartu dute.
Piketeetako kideetako batek jaso duen kolpearen argazkia du HITZA-k. Pertsona batek gutxienez jo duela Iztietako osasun etxera artatua izateko ere jakin du komunikabide honek.
Atxilotuak hiru ordu emango ditu Errenteriako Ertzain Etxean agintaritzaren agenteen aurkako atentatua egotzita, ordezkari sindikalek jakinarazitakoaren arabera. Ez litzateke gaurko egunarekin lotuta egin duten atxiloketa bakarra; bigarren lagun bat ere atxilotua omen dute Errenteriako Ertzain Etxean grebaren karietara, baina ez dakite momentuz zein herritakoa den, Oiartzunen edota Astigarragan egindako atxiloketa izan daitekeela aipatu dute.
Tentsio une gehiago ere izan da. Nafarroa etorbidean ziren poliziaren ibilgailuak kontrako norabidean joan dira Segundo Izpizua kaletik barrena, Biteri kalera. Foru plazan zabalik zen gaileta denda batera joanak ziren piketeak. Bi lagun identifikatu ditu Ertzaintzak une horretan.
Giroa lasaia da une honetan (10:45) eta greba egun baten itxura dute kaleek merkataritza saltoki gehien-gehienak itxita erdialdean. 12:30ean abiatuko da manifestazioa Donostiako Pio XII plazatik.
Arratsaldean, berriz, Errenteria-Oreretan izango da manifestazioa eta 18:30ean abiatuko da Herriko Plazatik. Grebaren deitzaileek herritar guztiak deitu dituzte manifestazioan parte hartzera, “gutxieneko 1.500 euroko soldata eta bertan erabakitzea eskatzeko”.
