Antxoko berdeguneak aldarrikatuko ditu Moliño Trailek
Antxoko Topaguneak Moliño Trail mendi lasterketa egingo du lehen aldiz maiatzaren 9an, barrutiko berdeguneak erakutsi eta herria aktibatzeko. Lasterketaz gain, bazkaria eta kontzertuak egingo dituzte.
Mendi lasterketak modan daudela ezin da ukatu. Gaur egun nonahi aurki daitezke proba horiek. Lasterketa horietako asko, gainera, Oarsoaldean dira, eta zerrenda horri proba berri bat gehituko zaio aurki, Antxoko Topaguneak Moliño Trail lasterketa sortu eta antolatu baitu lehen aldiz. Proba maiatzaren 9an jokatuko da, 10:00etatik aurrera.
Traila modan dagoenez, Antxon mota horretako lasterketa bat sortu nahi izan dutela jakinarazi dute Julen Lazkano Solaz eta Manex Gondat Unzalu Topaguneko kideek. Antxok ez ditu berdegune asko, baina horiek aldarrikatu nahi dituztela adierazi du Gondatek. Lasterketak 12 kilometro eta 350 metroko desnibel positiboa izango du. Hasiera eta helmuga Ibaiondo plazan kokatuko dira, eta bidean Molinaora eta San Marko mendira joko dute lasterkariek. Barrutia eta inguruak ezagutarazteaz gain, Topagunearen helburuak «herria aktibatzea, aisialdirako aukerak eskaintzea eta jarduerak euskaratik eta euskaraz antolatzea» direla baietsi du Lazkanok.
Probako izen emateak hilaren 5ean ireki ziren. Horiek Kronoak atarian egin behar dira, eta dortsalek 18 euroko prezioa dute. Moliño Trailek 200 lasterkarirentzako muga du, eta une honetan 80 pertsonak baino gehiagok eman dute izena. Antolatzaileek adierazi dute Moliño Trail ez dela lasterketa zail bat, eta pasaitar guztiei dei egin diete parte hartzera.
Topaguneko kideak babesle bila ari dira orain. Horrez gain, Pasaiako eta Errenteriako udalekin harremanetan ari dira, beharrezko baimenak kudeatzeko. Gaur (hilak 20, ostirala), gainera, boluntarioentzako galdetegi bat irekiko dute, lasterketaren egunean lagundu ahal izateko. Azkenik, apirilaren 12an topaketa bat egingo dute lasterketaren ibilbidearen errekonozimendua egiteko.
Duela urte batzuk Topaguneko kideek Moliño Mari izeneko pertsonaia sortu zuten jaietarako. Pertsonaia horren irudia errotzeko eta lasterketa Molinaotik pasatzen dela aprobetxatuta jarri diote lasterketari Moliño Trail izena.
Lasterketa bat baino gehiago
Eguneko jarduera nagusia mendiko lasterketa izango bada ere, programazioa ez da horretara mugatuko, sustatzaileek egun osoko egitaraua ondu baitute. Lasterketa egiten den bitartean, haurrentzako jolasak egingo dituzte, gazteenek ere aukera izan dezaten egunaz gozatzeko. Ondoren, bazkaria egingo dute. Antxoko berdeguneak aldarrikatzeko eta espazio berrien aldeko apustua egiteko, sabelak Molinaoko futbol zelaian beteko dituzte. Bazkaldu eta gero Tapiak eta Leturiak kontzertua emango dute leku berean. Eguna bukatzeko, Joselontxos txarangak barrutia girotuko du.
