Korrika Txikia eginda, prest dira haurrak Korrikarako
Korrika Txikia egin dute Elizalde Herri Eskolako eta Haurtzaro Ikastolako ikasleek eguraldia lagun zutela.
Ez da berria Oiartzunen Korrika Txikia egitea. Bai, ordea, bertan parte hartzen dutenek zein haurrak korrika ikusten dituztenek sentitzen duten emozioa. Gustura egoteko moduan dira gainera bizilagunak, eguraldi ezin hobe bat izan baitute herriko kaleak zeharkatzen zituzten bitartean.
Urtero bezala, Elizalde Herri Eskolako eta Haurtzaro Ikastolako ikasleak izan dira herriko Korrika Txikia egin dutenak, eta bi ikastetxeetako ikasleak biltzen dituen lekutik abiatu dute bidea: Beheko Plazako biribilgunetik.
Esku ugaritatik pasa da lekukoa, eta irribarrea izan dute lagun berau eraman duten protagonista guztiek. Beti bezala, Haurtzaro Ikastolako eta Elizalde Herri Eskolako haurrak txandakatuz eraman dute lekukoa, eta giro ezin hobea sortu dute ikasle, irakasle eta gurasoen artean.
Bada, goizeko txanda ez da nahikoa izan herriko txikienentzat, gaur gauean, goizeko ordu txikietan, zehazki, Korrika Oiartzungo kaleetatik igaroko baita. 02:51an hartuko dute herriko lehen lekukoa Tajo kooperatiba elkarteko langileek zein Niessengo langileek, eta honako eragileei emango diete txanda gero: La casa del cafe eta Carrefourreko langileak, Artaso kultur eta kirol elkartea, Auzokalte elkartea, Girizia elkartea, Biyurrienea gazte elkartea, Oiartzun Kirol Elkartea, Oiartzungo Feministen Asanblada, Ugaldetxo kultur taldea, Aldeguna gizarte ekintza elkartea, Gazte Izanak Oiartzungo jubilatu eta pentsiodunen elkartea, Labore Oarso, Iturri-Berri elkartea, Santiyuk Iturriotz festa batzordea, Altzibarko festa batzordea, Elizaldeko Hezkuntza komunitatea, Euskal pilota selekzioaren Oiartzungo ordezkariak, Intxixu AEKko ikasleak Oiartzungo Udala, Haurtzaro Ikastola, Oiartzo Ikastola, Killirikupe, Miren Taberna areto futbola, Bizardia kultur eta kirol elkartea, EH Bildu Oiartzun, Oiartzungo ezker abertzalea eta Oiartzungo Sare.
