Txikitik, baina handira euskararen alde Korrikarekin
Korrika Txikia egin dute gaur arratsaldean Lezon. Txikitik, euskararen alde eragiteko hautua egin dute gazteenek.
24. Korrika bihar helduko da Lezora. Aurretik ordea, gazteenek eta Korrikaren testuinguruan euskararen alde egiteko nahia dutela azaldu dute. Tamainan txiki, baina asmoetan handi. Hori azaldu dute gaurko (asteazkena) Korrika Txikian parte hartu duten herriko ikastetxeetako ikasleek.
Goiko Plazan hasi dute Lezoko Korrika Batzordeak antolatutako gazte jarduera. Bidea musikadun autoak zabaldu du, eta esatariaren animo eta babes oihuek lagundu dituzte lekukoen eramaileak. Denak irmo, serio asko. Harro. Harroago inguruan izan dituzten kameradun senide eta hurbilekoak. Herriari bira eman diote lekukoa eskutik eskura pasaz; arazo txiki bat izan da: Donibane kaleko pibote batek ez zuen jaitsi nahi, eta hamar bat minutuz martxa geldirik izan da martxa txikia. Arnasa berreskuratzeko aukera izan da behintzat.
Karlos Saldisen bukatu da Korrika Txikia. Han askaria eta musika zituzten zain Korrikaren zale gazteenek. Festa betea, euskararen eta AEKren Korrikari esker, gaur arratsaldean Lezon.
Jarraian, Lezoko Korrika Txikiaren irudiak eta bideoa. Beherako, Korrikak herrian utziko dituen ekitaldien zerrenda.
24. Korrika Lezotik bihar (asteazkena) pasako bada ere, Lezoko Korrika Batzordeak antolatutako egitaraua ez da hor bukatuko. Jarduera dezente daude datozen egunetarako. Honakoak dira:
Hilak 26, osteguna
- 11:30ean, termika zenetik hasita, adinekoen Korrika edo Dinokorrika.
Hilak 27, ostirala
- 12:00etan, Lezo Institututik eta Pasaia-Lezo Lizeotik, Korrika Gaztea
- 19:00etan, Faktoriak eta Kuadrillategik antolatua, Mihiluze jolasa
Hilak 28, larunbata. Lezoko Korrika Eguna.
- 10:00etan, txistularien diana.
- 11:00etan, Korrikaren kantaren koreografia tailerra Karlos Saldisen.
- 12:00etan, haurrentzako herri kirolak Karlos Saldisen.
- 14:00etan, herri bazkaria Karlos Saldisen. Txartelak Oroitzene AEKn eta Tiñelun salgai.
- 16:00etan, bingo musikatua Karlos Saldisen.
- 17:00etan, Kuadrillen Arteko III. Sokatira Txapelketa Karlos Saldisen.
- 18:00etan, txarangarekin kalejira.
