Lau Korrika Txiki, eta mezu bakarra: "Bai euskarari!"
Korrika Txikiak egin dituzte gaur arratsaldean herriko lau barrutietan. Euskarak badu etorkizuna Pasaian.
San Pedroko Korrika Txikiaren une bat.Ximun Leturia Lete 24. Korrikak bihar (hilak 25, asteazkena) zeharkatuko ditu errepidez eta itsasoz Pasaiako lau barrutiak. Bi urtez esperoan izan dira herritarrak AEKren sostengurako eta euskararen bultzadarako egitasmo izerditsuarekin bat egiteko. Herritarrak hitzaren atzean osoki hartu beharreko gizartearen segmentua badago ere, jendarte horren zati oso esanguratsu batek gaur (asteartea) egin du bat Korrikarekin. Esanguratsua, haiek direlako euskararen etorkizuna. Baiezkoa eman diote gaur bertako hizkuntzari, Korrika Txikiak egin direlako lau barrutietan, eta antza, forma askotako olatuen kontra egiten duen euskararekin jolas, dantza, abestu, ikasi eta bizi nahi dutelako.
Antxon, Donibanen, San Pedron eta Trintxerpen egin dituzte gaur arratsaldez Korrika Txikiak. Lehen hiru barrutietako irudi sorta, eta Trintxerpeko bideoa datoz jarraian. Hitzez baino, irudiz hobe delako azaltzea euskarari ‘bai’ esaten dioten horiek egin dutena.
