Albaolak AinguraOla inauguratu du
AinguraOla XVI. mendeko baleontzi handiek zeramaten aingura forjatuen berregitean oinarritutako espazioa izango da, eta 'San Juan' baleontziaren aingurak eraikitzea ahalbidetuko du.
Albaola Itsas Kultur Faktoriak AinguraOla inauguratu du gaur. AinguraOla XVI. mendeko baleontzi handiek zeramaten aingura forjatuen berregitean oinarritutako “espazio bizia eta esperimentala” izango dela aurreratu du Xabier Agote Albaolako presidenteak, Albaolan bertan bisitagarri egongo dena. Gune berri horrek San Juan baleontziaren aingurak eraikitzea ahalbidetuko du, eta Erdi Arotik Euskal Herria ontzigintzako materialen ekoizle nagusietako bat izan dela aldarrikatuko du.
Urteetako ikerketa lanaren ondoren, Albaolako taldeak ez du inon aurkitu gaur egun San Juan baleontziaren jatorrizko ezaugarriekin aingurak egiteko gai den errementaririk edo tailerrik. Gaur egun, ontzi historiko gehienek burdina galdatuzko aingurak erabiltzen dituztela jakinarazi du Agotek, “jatorrizko formak imitatuz baina metodo tradizionaletik urrun”. Bide horretan, Albaolak sortutako AinguraOlak “aukera paregabea” eskainiko du ainguragintza eta galdutako itsas teknologia berreskuratzeko, eta horiek publikoari gerturatzeko.
Erronka berri horri aurre egiteko, Albaolak tamaina handiko sutegi historiko bat egokitu du, Gipuzkoako aizkora artisauen azken fabrikatzailea den Hachas Jauregik dohaintzan emandako hauspo batez hornitua. Jardunean Albaolako errementariak arituko dira, Toledoko Ramon Recuero Errementari Eskolan trebaturako profesionalak direnak.
AinguraOla Albaolako filosofiaren oinarriarekin bat datorrela adierazi du Agotek, “ezagutza galduak berpiztu eta euskal itsas ondarea ukigarri” egongo baita. Orain arte probak egin dituzte tamaina txikiagoko aingurekin, eta prest daude San Juan baleontziaren aingura desberdinen erreplikak forjatzeko. Horietako aingura bat, egoera onean dagoena, Kanadako Red Bayko urpeko hondakinen ondoan aurkitu zen, eta, egun, bertako euskal baleazaleen museoan bisita daiteke.
Aurrez aipatu bezala, AinguraOla berria bisitagarri egongo da Albaolan, eta bisitariek zuzenean ikusi ahal izango dute errenazimenduko forja prozesu bat, “ainguren garrantzia eta ontzigintzan izan zuten funtsezko eginkizuna ulertzeko aukera emanez”. Gaur inauguratu den espazioak itsas errementarien lanbidea, ainguraren balio kulturala eta teknikoa eta Euskal Herriko itsas historiaren pasarte ahaztuak elkarri lotzeko aukera emango duela baietsi du Agotek.
Albaolak ateak zabalik izango ditu Aste Santuan, ordutegi bereziarekin. Apirilaren 2tik 6ra, ontziola museoa 10:00etatik 14:00etara eta 15:00etatik 19:00etara bisitatu ahal izango da. Horrez gain, egun horietan AinguraOla martxan ikusi ahal izango da, 18:00ak arte. “Une paregabea da AinguraOla zuzenean ezagutzeko: munduan bakarra den espazioa, non burdina, sua eta historia bisitarien aurrean bizirik agertzen diren”, adierazi du Albaolak.
