Korrikaren harrobia, geldiezina
Korrika Gaztea egin dute agur goizean Lezo Institutuko eta Pasaia-Lezo Lizeoko ikasleek. Arin eta animoso azaldu dira euskararen alde.
Ez zeuden parrandan, Korrikan baizik. Gaur egin dute Lezoko azken Korrika: Korrika Gaztea. Asteartean Korrika Txikia izan zen, asteazkenean pasa zen 24. Korrika herritik, atzo adinekoen Tipi-Topa Korrikaren txanda, eta gaur, gazte eta nerabeena. Arin eta animoso egin dituzte herriguneko kilometroak, geldiezin. Korrikak badu harrobia, beraz, euskararen bizirauteak badu etorkizuna. Herriari bira eman ostean, Karlos Saldise plazan ekitaldia egin dute Lezo Institutuko eta Pasaia-Lezo Lizeoko gazte eta nerabeek.
Gaurkoaren ondoren, agortzear dira Lezoko Korrika Batzordeak antolatu dituen ekitaldi eta jarduerak. Hala ere, badira batzuk aurretik, tartean delarik biharko (larunbata) Lezoko Korrika Eguna. Beheko koadro urdinean ikus daitezke deialdi horiek.
Jarraian, Ximun Leturia Letek Lezoko Korrika Gaztean jaso dituen irudiak, eta bideoa.
24. Korrika. Lezoko egitaraua.
Hilak 27, ostirala (gaur)
- 19:00etan, Faktoriak eta Kuadrillategik antolatua, Mihiluze jolasa
Hilak 28, larunbata (bihar). Lezoko Korrika Eguna.
- 10:00etan, txistularien diana.
- 11:00etan, Korrikaren kantaren koreografia tailerra Karlos Saldisen.
- 12:00etan, haurrentzako herri kirolak Karlos Saldisen.
- 14:00etan, herri bazkaria Karlos Saldisen. Txartelak Oroitzene AEKn eta Tiñelun salgai.
- 16:00etan, bingo musikatua Karlos Saldisen.
- 17:00etan, Kuadrillen Arteko III. Sokatira Txapelketa Karlos Saldisen.
- 18:00etan, txarangarekin kalejira.
