'Donazioak' erakusketa bisita daiteke Jantziaren Zentroan
Jantziaren Zentroak dohaintzan jasotako arropa eta objektuekin jarri du martxan erakusketa. Maiatzaren 31ra arte bisitatu ahal izango da, larunbat, igande eta jaiegunetan.
Jantziaren Zentroak Donazioak izeneko erakusketa jarri du martxan dohaintzan jasotako arropa eta objektuekin. Kapitain-etxeko gunean Euskal Herriko hamabi jantzi bisitatu ahal izango dira, XX. mendeko ia hamarkada guztietakoak. Horien artean lau ezkongai jantzi ikusi ahal izango dira, 1860, 1914, 1960 eta 1970ekoak. Gainerakoak kaleko jantziak dira, eta sustatzaileek bat nabarmendu dute: Pedro Rodriguez Errenteria-Oreretako jostunak Donostiako tailerretan sortutakoak. Objektuei dagokienean, emakumezko txapelak eta eskuko poltsak ikus daitezke.
Erakusketan, gainera, jantzi edo objektu bakoitzaren alboan, dagokion informazio zehatza aurki daiteke: urtea, jatorria eta pertsona edo familia eramailearen izena. Erakusketako pareta batean, urte hauetan guztietan Jantziaren Zentroari familian gordetako ondarea eman dioten familia zein norbanakoen izenak ageri dira. Ia 200 izen dira guztira.
Jantziaren Zentroak dohaintza bat jasotzen duenean, jantzi zein objektuen inguruan ezagutzen den informazio guztia biltzeko saiakera egiten duela jakinarazi du. Informazio hori, jasotako piezaren argazkiarekin eta duen kontserbazioaren deskribapen zehatzarekin batera gordetzen da. Ondoren, Jantziaren Zentroak emaileari ziurtagiria bidaltzen dio, jasotako ondarearen deskribapena eta haren zaintza eta jagoletarako hartutako konpromisoa hartuz.
Jantziaren Zentroak jakinarazi du ondarearen parte izan daitekeen piezaren bat eduki eta behar bezala gorde edo zaindu ezin ala nahi ez duten pertsona edo familiak haiekin kontaktuan jar daitezkeela, posta elektroniko bidez.
Donazioak erakusketa doan bisita daiteke maiatzaren 31ra arte, honako ordutegian: larunbatetan 11:00etatik 14:00etara eta 17:00etatik 20:00etara, eta igande eta jaiegunetan 11:00etatik 14:00etara.
