Xabier Salillas antxotarra, atletismoaren gorenean
Ultrafondoko lasterkari antxotarrak denboraldi bikaina darama, jokatutako azken bi probak bere egin baititu. Orain, begiz jota du zortzi eguneko munduko txapelketa.
Xabier Salillas ultrafondoko lasterkari antxotarrak denboraldi bikaina darama, jokatutako azken bi probak bere egin baititu. Salillasek orain begiz jota du zortzi eguneko munduko txapelketa. Txapelketa hori zortzi egunetan lehiatzen da, eta zirkuitu bati itzuli eta kilometro gehien egiten dizkion parte hartzailea gailentzen da. Mota horretako probak prestatzeko, Esl Sitges Burjassot talde indartsuarekin fitxatu du.
Zortzi eguneko munduko txapelketa prestatzeko, otsailaren 21ean 50 kilometroko Mamut lasterketa lehiatu zuen Madrilen, eta irabazi egin zuen. Iragan asteburuan, aldiz, Burjassoteko (Valentzia) 48 orduko martxan azkarrena izan zen. Lasterketa irabazteaz gain, Salillasek probako eta Valentziako errekor berriak ezarri ditu. Izan ere, Esl Sitges Burjassot taldea valentziarra da, eta Salillasek autonomia erkidego horren lizentzia federatiboa du.
Errekuperatzeko denbora izan gabe, apirilaren 8an Nizan (Frantzia) arituko da. Bost eguneko lasterketa bat da, eta zirkuitu bati buelta gehien ematen dizkion lasterkaria gailenduko da.
