Esker oneko edo maitasunezko gutunak bidaltzeko aukera
Adinkidek esker oneko edo maitasunezko gutunak idazteko egitasmo bat jarri du martxan. Gutunak entregatzeko azken eguna hilaren 17a da, eta 28an errezitaldi bat egingo da, Trintxerpeko alkateordetzan.
Argazkia: Mejor con salud. Adinkide elkarteak, Pasaiako Udalarekin elkarlanean, esker oneko edo maitasunezko gutunak idazteko egitasmo bat jarri du martxan. Helburua da gutun edo kontakizun labur bat idaztea. “Lagun bati, amonari, iraganeko zure niari edo etxean sentiarazten zaituen auzoko bizilagun bati bidalitako gutuna izan daiteke; juzgurik gabea, estilo araurik gabea, bihotz-bihotzetik idatzita. Eskerrik asko esateak edo maite zaitut esateak askeago egiten gaitu. Gure zaurgarritasuna erakusten dugunean, gure harremanetako benetakotasuna agertzen dugu”, adierazi dute Adinkideko kideek.
Jasotako gutun guztien artean batzuk aukeratuko dituzte, eta horiek errezitaldi batean partekatu. Topaketa hilaren 28an izango da, Trintxerpeko alkateordetzan, 18:30etik aurrera. “Topagune bat izango da, eta bertan zuen ahots batzuk gureen ondoan irakurriko ditugu, auzoko pertsonen artean zubiak sortzeko”, aurreratu du Adinkidek.
Egitasmoan edonork har dezake parte, baldintza bakarra da gutun bat idaztea. Idazki horiek Trintxerpeko alkateordetzan kokatuta dagoen postontzian, posta elektronikoz edo 650 48 11 38 telefonoan entrega daitezke. Gutunak entregatzeko azken eguna hilaren 17a da.
