Kirolean euskara eta genero berdintasuna txertatzea helburu
Gazteekin zuzenean lan eginez, kirol ingurunean ematen diren botere harremanak, lehiakortasuna eta hizkuntza ohiturak eraldatzeko estrategiak proposatzen ditu egitasmo horrek.
Pasaiako Udalak, Pasaiako Kirol Badia klubarekin, Kiru-Do karate klubarekin, Koxtape Arraun Elkartearekin eta Euskal Herriko Unibertsitatearekin elkarlanean, kirolean euskara sustatzeko eta genero berdintasuna lantzeko egitasmo bat abiatu du. Gazteekin zuzenean lan eginez, kirol ingurunean ematen diren botere harremanak, lehiakortasuna eta hizkuntza ohiturak eraldatzeko estrategiak proposatzen ditu iniziatiba horrek.
Proiektua hiru fasetan banatu da: 2023-2024 ikasturtean ikerketa egin zen, 2024-2025ean esku hartze pilotua eta 2025-2026an lan hori finkatzen eta zabaltzen ari dira. Hona hemen ikasturteko hiru lan lerro nagusiak:
- Zabalpena: Egindako lana herritarren artean ezagutaraztea, bereziki sortutako ikus-entzunezkoaren bidez, eta beste klub batzuk prozesura gerturatzea.
- Kontrastea: Adituekin eta herriko eragileekin (udal teknikariak edota klubak) hausnarketa saioak egitea programa doitzeko.
- Esku hartzea: Saio sistematizatuak egitea kirolari gazteekin eta entrenatzaileekin, azken horiek balioen erreferente gisa formatuz.
Egitasmoaren muina gazteen ahotsa erdigunean jartzea izan dela adierazi dute sustatzaileek, haien bizipenetatik abiatuta kirol taldeak babesgune bihurtzeko, euskararentzako arnasgune eta genero bereizketarik gabeko praktika berrientzako espazio gisa. Proiektuaren nondik norakoak bideo batean jaso dituzte, eta 2026ko Kirol Galan aurkeztu zuten ikus-entzunezko pieza hori.
