Oarsoaldeko Energia Bulegoa ezagutarazteko hitzaldia, Lezon
2025eko maiatzetik da martxan eskualdeko energia bulegoa. Dituen baliabideen berri emateko Lezoko hitzaldia hilaren 20an izango da.
Lezoko udaletxean dago HAZ bulegoa, eta asteazkenero, Energia Bulegoa.Izaro Perez Loperena 2025eko maiatzetik martxan da Oarsoaldeko Energia Bulegoa. Lezon, zehazki, asteazkenero izaten dira udaletxeko Herritarren Arreta Zerbitzuan (HAZ) bulegoko kideak lezoarrei zerbitzua ematen, eta fakturei, tarifei, bonu soziala bezalako laguntzei, energia berriztagarriei, etxebizitzen birgaitzeari eta abarri buruzko aholkularitza pertsonalizatua eskaintzen du. Zerbitzua ezagutarazteko hitzaldia antolatu dute hilaren 20rako (astelehena) 17:00etan Amonen eta Aitonen Bordan.
Hitzaldian erraz azalduko da zerbitzu horrek nola lagun dezakeen etxeetako energia gastua murrizten eta energia eredu bidezkoagoa eta jasangarriagoa lortzen. “Oarsoaldeko Energia Bulegoa”, esan dute Oarsoaldea Garapen Agentziatik, “ez da telefono edo internet bidezko zerbitzua soilik. Lezon, aurrez aurreko arretarako gune bat dago udaleko HAZ bulegoan bertan. Asteazkenero, interesdunek hitzordua eska dezakete aldez aurretik, eta beren beharretara egokitutako aholkularitza pertsonalizatua jaso”.
Hitzordua eskatzeko edo informazioa lortzeko hainbat bide daude. Telefonozko kontaktua nahi bada 943 34 41 60 zenbakira deitu behar da; posta elektronikoz ere egin daiteke harremana, eta Oarsoaldea Garapen Agentziaren webgunean zerbitzuaren gaineko behar adina informazioa dago, baita zita eskatzeko inprimakia ere.
Antolatzaileek Lezoko herritar guztiak animatu dituzte hitzaldi horretan parte hartzera eta, batez ere, martxan dagoen zerbitzu publikoa erabiltzera, “aurrezpen ekonomiko handia eta bizi kalitatearen hobekuntza ekar dezake”.
