Memoria duen artelana
Errenteriako Udalaren esanetan, garrantzitsua da udalerrian memoria inklusiboaren eta bizikidetzaren alde egin den bideak espazio publikoan ere bere isla eta tokia izatea.
Memoriaren proteina artelana, Ainhoa Redondok egin duHerri Bizia Udalerrian gertatu diren giza eskubideen aurkako urraketak jaso, horiek eragindako mina aitortu eta herri gisa etorkizunean errepika ez daitezen konpromiso kolektiboa hartzeari begira bide esanguratsua egin du Errenteria-Oreretak. Hala azaldu du udalak, eta gaineratu, bide hori alderdi, eragile, herritar anonimo eta biktima askoren ekarpenari esker izan dela posible, baita Argituz elkartearen akonpainamenduari esker ere. Egindako bidea eta ekarpen horiek guztiak balioan jarri eta eskertzeko, udalak Ainhoa Redondo artista errenteriarraren sorkuntza lana jarri du espazio publikoan, leku ikusgarri batean.
Lanak Memoriaren proteina du izena. Artistaren hitzetan “katebegiak bailiran, DNA dugu dantzan eta nahaspilatutako sistema sinbiotiko batean elkar bizi diren biztanleak solasean dabiltza”. Hainbat galdera izan omen ditu buruan sortzaileak, bere obra egiteko garaian: “Nondik datoz katebegiak, norantz jarraituko ote dute? Katramilatutakoak askatuko al dira? Zauriak noizbait itxiko al dira?”.
Redondoren artelana paperean egina dago, akriliko beltzarekin, collagea eta pintura uztartuz eta teknika digitala ere baliatuta. Espazio publikoan bere tokia izan dezan, euskarri batean jarri da, Altzate auzoko Mari Zozaia pasealekuan, zehazki, Altzate 7 eraikinaren parean, Oiartzun ibaira begira.
Errenteriako Udalaren esanetan, garrantzitsua da udalerrian memoria inklusiboaren eta bizikidetzaren alde egin den bideak espazio publikoan ere bere isla eta tokia izatea, “eta, gure udalerriak kulturarekin eta sorkuntzarekin hain lotura estua duenez, eta kultura gure ikuspegi kritikoa garatzeko ezinbesteko tresna denez, egokia iruditu zaio udalari espazio publikoan udalerriko txoko bati herriko sortzaile baten lanarekin esanahia ematea”.
Memoria lantzea ezinbestekoa jo du udalak, “gizarte justuago eta kohesionatuago bat eraikitzeko, etorkizunera begiratzeko, baita, aniztasunean, errespetuan eta elkarrizketan oinarrituko den elkarbizitza eraikitzea ere”. Horri guztiari ekarpena egin nahi omen dio iniziatibak.
