Bi urrezko eta brontzezko bat Koxtapek, eta zilarrezkoa Hibaikak
Espainiako Batel Txapelketa jokatu dute asteburuan Legution. Bi bandera eta brontzezko domina irabazi ditu Koxtapek ; Hibaikak, berriz, zilarrezko domina.
Koxtapeko arraunlariak asteburuan irabazitako bi banderekin. Emaitza ezin hobeak Pasai Donibaneko arraun elkartearentzat asteburuan. Legution larunbata eta igandean—kanporaketak eta txapelketa— jokatutako Espainiako Batel Txapelketatik bi urre eta brontzearekin itzuli dira Koxtapekoak. Zehazki, Emakume Absolutuetan eta 23 urtez azpiko Gizonetan irabazi zuen bandera eta urrezko domina San Juan-Koxtapek atzo; brontzea, berriz, Emakume Gazteek zintzilikatu zuten.
Ez dira sariarekin etxera itzuli diren talde bakarra. Hibaikako Gazte Mailako Emakumeek ere lan bikaina larunbateko kanporaketan eta atzoko txapelketan. Espainiako Baten Txapelketan bigarren postua lortu zuten Errenteria-Oreretakoak eta zilarrezko domina zintzilikatu.
Trainerilla Liga
Aurtengo batel denboraldia bukatuta, Trainerilla Ligan buru belarri ari dira orain arraunlariak. Joan den asteburuan hasi zen txapelketa hori Orion larunbat arratsaldean egindako lehen jardunaldiarekin.
Oarsoaldeko eskifaiek lan ona, oro har, ligaren lehen jardunaldi horretan. Gazte Emakumeetan garaipena Hibaikarentzat lehen jardunaldi horretan; maila bereko gizonetan, berriz, San Juan Koxtapekoak izan ziren azkarrenak. Kadete mutiletan, San Pedro bigarren, eta Hibaika, hirugarren izan ziren.
Emakume Absolutuetan Koxtapekoek hirugarren egin zuten.
Pasaiako Badiak hartuko du datorren larunbatean Trainerilla Ligako bigarren jardunaldia, Pasai Donibanek antolatuta, 16:30ean hasita.
Hibaikako Gazte Emakumeek zilarra irabazi dute bigarren eginda, eta kategoria bereko Koxtapekoek hirugarren, eta brontzea irabazi.
Trainerilla Ligaren egutegia
- Apirilak 25, larunbata: Pasai Donibanen Trainerilla Ligako bigarren jardunaldia 16:00etan hasita.
- Maiatzak 1, ostirala: Donostian, Fortuna elkarteak antolatuta, 16:30etik 19:00etara.
- Maiatzak 2, larunbata: Orion, Hernani-Oriok antolatuta, 16:30etik 19:00etara.
- Maiatzak 3, igandea: Getarian, 10:00etatik 14:00etara.
- Maiatzak 9, larunbata: Gipuzkoako Trainerilla Txapelketarako sailkapen estropada Hondarribian, 16:00etatik 18:30era.
- Maiatzak 10, igandea: Gipuzkoako Trainerilla Txapelketa Mutrikun, 10:00etatik 14:30era.
- Maiatzak 17, igandea: Euskadiko Trainerilla Txapelketa Legution, 10:00etatik 14:00etara.
- Maiatzak 23, larunbata: Espainiako Trainerilla Txapelketarako sailkatze estropada, Legution 10:00etatik 14:30era.
- Maiatzak 24, igandea: Espainiako Tarinerilla txapelketa, Legution 11:00etatik 14:30era.
