Irakurketa Festa antolatu du Lekuona Fabrikak
Liburuaren Egunarekin jarri du hitzordua Lekuona Fabrikak; Irakurketa Festa egingo du egun horretan, baina jarduera gehiago ere antolatu ditu.
Udal Bibliotekak Irakurketa Festa hartuko du datorren ostegunean, hilak 23, 18:00etan Lekuona Fabrikako lehenengo solairuan, Jakinmin Elkartearen eskutik: “New York bezalako hainbat hiri handitara zabaltzen ari dira dagoeneko tankera honetako festak. Formatu txikian ekarri nahi izan dira, metodologia dialogikoarekin aberastuta”.
Irakurketarekiko interesak, sozializatzeko gogoak eta taldean hausnartzeko nahiak bat egiten dute saio horretan, liburu bat eta ondo pasatzeko gogoa eraman beharko dituela parte hartzaile bakoitzak festara azaldu dute antolatzaileek. Hiru zatitan banatuko da saioa: Irakurketa isila; partekatze informala; elkarrizketa filosofikoa.
Saioa elebitan izango da eta haur, gazte eta helduei zuzendua dago. Ekitaldiaren bukaeran parte hartzaileei zizka-mizka txiki bat eskainiko zaie. Parte hartu ahal izateko, beharrezkoa izango da izena ematea.
Mikroipuinen tailerra
Bestalde, Udal Bibliotekak, beste literatur ekintza bat jarriko du martxan: mikroipuinen tailerra. Tailer horren bidez literatura eta hizkuntzara hurbilduko dira, kontakizun laburrak aztertuz eta sortuz. Helduentzako ekitaldia izango da, gaztelaniaz.
Lau egunetako tailerra izango da, arratsaldeko 18:30ean, Ana Merino dinamizatzailearekin: hilaren 22an, maiatzaren 6an eta 20an, eta ekainaren 10ean. Beharrezkoa da izena ematea parte hartzeko, eta saio guztietan parte hartu beharko da.
Jardunaldi ezberdinetan izena emateko bide ezberdinak izango dira. Online (klik hemen); Whatsapp bidez: 647 673 45, edota, telefonoz: 943 44 96 34.
Azkenik, liburu aurkezpen izango da bihar, asteartea, 18:30ean, Ander Mayoren eskutik. Aforismoen El aullador liburua aurkeztuko du hain zuzen ere. Helduentzako ekitaldia izango da, eta kasu honetan, ez da beharrezkoa izango izena ematea.
