Gartxot eta Garazi Esnaola, basilikan
Bi musikariek kontzertua emango dute hilaren 23an (osteguna) Lezoko Gurutze Santuaren basilikan.
Garazi Esnaola eta Gartxot. Kontzertu berezia ostegunean (hilaren 23an) Lezon. Berezia musikariengatik, eta tokiagatik. Gartxot abeslariak eta Garazi Esnaola piano jotzaileak lehenaren Bizirik gaude diskoan oinarritutako kontzertua emango dute Gurutze Santuaren basilikan. 19:00etan hasiko da.
Doan da sarrera. Aurrez, ordea, gonbidapena hartu behar dela azaldu du Lezoko Udalak, basilikaren eserlekuen muga ez gainditzeko. Horiek Lezoko Udalaren Interneteko sarreren kudeaketa zerbitzuaren bidez eskura daitezke.
Bizirik gaude Gartxot Unsain donostiarraren lehen diskoa da. Bi urteko sormen prozesuan izan da 11 kantuko lana osatzeko. Orain, estudiokoa zuzenekora bideratzen ari da, Garazi Esnaola pianista lizartzarrarekin espazio intimoak bilatuz.
Beheko bideoan ostegunean Lezon entzun ahalko den abestia, Gartxoten Youtube kontutik hartutakoa. Azpeitian martxoaren 15ean eman zuten kontzertuaren soinu-probakoa da.
