Oiartzun eta Gaintxurizketa arteko topoaren bidea bikoizteko azterlana egingo dute
2,4 kilometroko bidean bikoizketa egiteko azterlanaren idazketaren lizitazioa egin du Eusko Trenbide Sareak.
Oiartzungo topo geltokia.Irekia / Eusko Jaurlaritza Eusko Jaurlaritzako Mugikortasun Jasangarriaren Sailak, Eusko Trenbide Sarearen (ETS) bitartez lizitaziora atera du Gaintxurizketako (Lezo) eta Oiartzungo topo geltokien artean trenbidea bikoitzeko informazio azterlanaren idazketa. 650.000 euro erabili beharko dituzte hori idazteko interesa duten enpresek, 15 hilabeteko epean. Osotara 2,4 kilometro daude bi geltoki horien artean, eta trenbide bakarra. Hala, azterlan horretan bi trenbide nola egin proposatu beharko dute esleipen prozesuarekin bat egingo duten ingeniaritza enpresek. “Bikoizketak trenak gurutzatzea ahalbidetuko du, zirkulazio sarea hobetzeko eta maiztasunak handitzeko, Irunerantz batez ere”.
Mugikortasun Jasangarriaren Sailak jakinarazi du hainbat zailtasun tekniko izango dituztela bikoizte hori egiteko lanek. Batetik, bi geltokien artean bi tunel daude, bat 358 metro luzekoa eta bestea 223koa. Gainera, ia bi kilometro eta erdiko zati horretan azpitik hiru pasagune ditu egungo trenbideak. Gainera, inguruan diren trenbide eta garraio azpiegiturekin integrazioa eta konexioa jaso behar dute enpresek euren azterlan proposamenetan.
Azterlan horretan obrak egiten diren bitartean izan daitezkeen behin-behineko desbideratze edo ustiapen egoera bereziak jaso behar dira, eta obrak faseka egite komeni den ala ez erabakiko da horren arabera.
Susana Garcia Chueca sailaren buruak adierazi du Hendaia-Donostia arteko topoaren trenbidean Altza-Galtzaraborda tarteko lanak oso aurreratuak doazela, eta horien barruan Antxoko lur azpiko geltoki berria, nahiz bide horren bikoizketa osoa daude sartuta. “Epe ertainean geltoki berri bat eraikiko da Errenteriako auzo horretan, eta udalerri horren erdigunean terminal berri bat eraikitzea eta Gaztañoko trenbide pasagunea kentze aurreikusten dira”, esan du sailburuak.
Gipuzkoa, Bizkai eta Arabako trenbide sareak 200 kilometroko luzera du, eta horren %67 trenbide bakarrekoa da.
