Emakume hautetsien kontrako indarkeria sexistari aurre egiteko iniziatibara batu da udala
EUDELena da iniziatiba. Besteak beste, prebentzio, babes eta sentsibilizazio neurriak ezartzeko konpromiso hartu du udalak, erakundeekin eta gizarte eragileekin elkarlanean.
Errenteriako Udaleko emakume hautetsiakHerri Bizia Euskadiko udaletan emakumezko hautetsien kontrako indarkeria sexistari aurre egiteko EUDELen iniziatibarekin bat egin du Errenteriako Udalak. Testuinguru horretan, emakume eta gizonen parte hartze politikoari dagokionez eskubideen, tratuaren eta aukeren berdintasuna tinko defendatuz, hainbat konpromiso hartu ditu.
Konpromiso horiek, ondokoak: zeharo arbuiatzea emakume hautetsiek beren eginkizunak betetzeagatik jasotako indarkeria oro fisikoa, psikologikoa, sinbolikoa edo digitala izan; parte hartze politiko parekide eta jazarpenik gabekoaren aldeko jarrera sendotzea, demokrazia osasuntsu baten oinarrizko zutabeetako bat baita; eta, prebentzio, babes eta sentsibilizazio neurriak ezartzea, erakundeekin eta gizarte eragileekin elkarlanean.
Azken horren barruan, udal itunak sinatzea aurreikusi du: “alderdi guztien konpromiso publikoa, barneko eta kanpoko sexismoa zigortzeko”. Errenteriako udalaren webgunean emakume hautetsi guztien izenak eta argazkiak dituen gunea sortuko du, egungoaz gain, aurreko hautetsiak barnebiltzen dituena.
Aitorpen publikoa egitea ere erabaki du, eta horren barruan, M8an emakume zinegotzi guztien adierazpen bateratua irakurtzea adostu du udalak. Halaber, udaleko langile guztientzat, hautetsiak barne, tailerrak eskaintzea, berdintasuna, indarkeria matxista eta hizkera ez sexista gaiak lantzeko. Aktetan hizkera inklusiboa eta ez sexista erabiltzeko konpromisoa ere hartu du, emakume hautetsien ekarpenak eta parte hartzeak agerian jartzeko.
Bukatzeko, doako lege aholkularitza izango dute eskura indarkeria matxistan espezializatutako abokatuekin, Emakumeen Etxean ematen den laguntzaren bidez, baita jazarpen eta indarkeria sexistako egoerak jasaten dituzten emakume hautetsiei laguntza psikologikoa emateko zerbitzua, Emakumeen Etxean ematen den laguntzaren bidez.
