Eraso faxista Gaztañon, berriro
Auzo lokaleko balkoian zintzilik ziren hainbat herrialdetako banderak kendu dituzte oraingoan.
Gaztañoko auzo lokalaren artxiboko irudia. Eraso faxista salatu du Gaztañoko auzo elkarteak. Beste bat. Joan den azaroan hirutan puskatu baitzuten faxismoaren kontrako pankarta bat auzoaren sarreran. Oraingoan auzo bihotzeraino jo dutela eraso faxista egiteko salatu du auzo elkarteak, auzo lokaleko balkoian elkartasuna adierazteko zintzilik ziren banderak kendu baitituzte.
Eraso faxista joan den larunbat goizaldean egin zutela jakinarazi du auzo elkarteak: “Orain arte egindako erasoetan auzoaren mugetan jardun badira ere, auzo lokaleraino iritsi dira oraingoan. Bertako balkoian, hain zuzen faxismoa erasotzen ari den zenbait herriei elkartasuna adierazteko jarrita genituen banderak hautsi eta kendu dituzte”.
Orain arte erasoa gertatutakoetan egin moduan, auzoak “kementsu eta tinko” erantzun duela jakinarazi dute, eta horrela egingo dutela orain ere, “beldurra galtzen hasi diren faxistei hortzak erakutsiko dizkiegu eta ez dugu erasorik utziko erantzunik gabe”.
