Delitu kopuruan, beheranzko joera
Delinkuentzia memorian 2025eko datuak jaso dituzte. Denera, 1.441 arau hauste izna dira Errenteria-Oreretan 2025. urtean, 2024an baino 294 gutxiago.
Beheranzko joera izan dute 2025ean arau hausteek, aurreko urteetako joerari eutsiz. Hala jakinarazi berri du errenteriako Udalak euskal poliziaren 2025eko delinkuentzia memoria jaso eta gero. Errenteriako Udaltzaingoak eta Ertzaintzak jasotako datuen arabera %9 jaitsi da delitu kopurua udalerrian joan den urtean, beheranzko joerari eutsiz. Hala ere, ziberdelituek gora egin duten: %9,04 gehiago izan dira; 603 salatu dira, 2024an baino 50 gehiago.
Zenbakietara eramanda, iaz 1.441 arau hauste izan dira, 2024an baino 249 gutxiago. Horren arabera, udalerriaren 1.000 biztanleko delinkuentzia tasa 51,39koa izan da 2025 urtean, aurreko urtekoa baino bost puntu baxuagoa.
Araba, Bizkai eta Gipuzkoan delitu presentzialak oso gutxi igo dira, % 0,18, eta ziberdelituak ere % 0,54 igo dira. Delitu presentzialen bilakaerari dagokionez, gainera, EAE mailan Gipuzkoa da gehien jaitsi den lurraldea, % 0,93. Ziberdelituen EAEko bilakaerari dagokionez, ordea, Gipuzkoa da gehien (% 1,06) igo den lurraldea.
Delinkuentzia tasari dagokionez, nabarmentzekoa da Oarsoaldearen tasa (% 40,05), Gipuzkoakoa (% 45,86) eta EAEkoa (% 48,11) baino txikiagoa dela.
Bitartekaritza, bizikidetza hobetzeko
Bitartekaritza eta Bizikidetza Zerbitzuaren 2025eko jardunaren balantzea ere egin du udalak. Iaz 49 kasu artatu zituzten. Zaratek eragindako bizikidetza arazoak izan dira nagusi, kasuen % 63. Urteko jarduna ixterakoan, kasuen % 63 ongi bideratuak edo jarraipen fasean zeuden. Bitartekaritza eta Bizikidetza zerbitzua gatazkei erantzuteko udal zerbitzua da eta bizilagunen arteko gatazkak zein espazio publikoan gerta daitezkeenak elkarrizketaren eta adostasunaren bidez bideratzen laguntzea du xede.
Zerbitzua asteartero ematen dute, 12:00etatik 19:00etara Errenteriako Udalean, eta zerbitzua erabili nahi izanez gero, txanda eskatu behar da 943 449 600 edo 010 telefono zenbakietara deituta edota posta elektronikora mezua bidalita (klik hemen).
