Inude eta Artzainek Trintxerpe hartuko dute bihar
Illunbe elkarteak antolatuta, desfilea Andonaegi jauregitik aterako da, 12:00etan. Trintxerpen eta San Pedron trafiko aldaketak izango dira.
Illunbe elkarteak antolatuta, Inude eta Artzainek dantzan jarriko dute Trintxerpe bihar (larunbata), 12:00etatik aurrera. Desfilea Andonaegi jauregitik aterako da, eta bertatik Urgill kalera joko dute. Ondoren, Oiartzun kalea, Ulia etorbidea, Azkuene kalea eta Euskadi etorbidea zeharkatuko dituzte. Dantzaldia Gudari plazan bukatuko da, eta bertan egingo dute azken ekitaldia.
Sustatzaileek antzinako jantziekin mozorrotu eta desfilean parte hartzeko gonbidapena luzatu diete herritarrei.
Inude eta Artzainen desfileak Trintxerpeko eta San Pedroko trafikoan aldaketak eragingo ditu. Euskadi etorbideko trafikoa moztuta egongo da 12:45etik 13:30era bitartean. San Pedrora sartu eta bertatik ateratzeko, Udaltzaingoak goiko auzoetatik desbideratuko du trafikoa.
Autobus zerbitzuari dagokionean, azken autobusa 12:40an irtengo da San Pedrotik, eta zerbitzua 13:40ra arte etengo da. Ohi bezala, azken geltokia Bidebietan kokatuko da.
