Moliño Festa egingo da maiatzaren 9an
Antxoko Topaguneak antolatutako jaiaren jarduera nagusia Moliño Trail mendi lasterketa izango bada ere, egun osoko programazioa ondu dute.
Maiatzaren 9an Antxoko Topaguneak antolatutako Moliño Festa egingo da Antxon. Eguneko jarduera nagusia Moliño Trail mendi lasterketa izango da. 12 kilometroko proba bat da, 350 metroko desnibel positiboarekin, eta irteera eta helmuga Ibaiondo plazan kokatuko dira. Antolatzaileen helburua da Antxok dituen berdeguneak aldarrikatzea eta herria aktibatzea. Bide horretan, lasterketak Molinaora eta San Marko mendira joko du. Proba 10:00etan hasiko da.
Lasterketa egiten den bitartean, Moliñomariren bila jarduera egingo dute, Txinparta Guraso Taldeak antolatuta. 12 urte arteko gazteei begirako jolasak dira, eta herrian zehar egingo dira. Moliño Trail bukatu ondoren, sari banaketa ekitaldia egingo dute, 12:15ean. 13:00etan, kalejiran joango dira Molinaora, han bazkalduko baitute antxotarrek.
13:30ean haurren herri bazkaria egingo da, eta 15:00etan, helduena. Bazkariko sarrerak salgai daude jada Mimos eta Txirin tabernetan. Haurrenak 12 euroko prezioa du, eta makarroiak eta saltxitxak dastatuko dituzte. Helduenak, aldiz, 18 euroko kostua du, eta menuan hasierako platerak, fideua, ardoa eta sagardoa daude sartuta. Aukera beganoa ere egongo dela jakinarazi dute sustatzaileek. Sabelak bete ondoren, jolasak egingo dituzte.
Arratsaldean musikaren txanda izango da. 18:00etan, eta Antxoko Gazte Mahaiaren eskutik, Tapiak eta Leturiak kontzertua eskainiko dute. Azkenik, 20:00etan, kalejira egingo dute Molinaotik Antxoko herrigunera, Joselontxos txarangarekin.
Moliño Festa
Maiatzak 9, larunbata
- 10:00: Moliño Trail lasterketa, Ibaiondotik abiatuta.
- 10:05: Moliñomariren hazien bila. 12 urte arteko haurrentzat jolasa herrian zehar.
- 12:15: Sari banaketa.
- 13:00: Kalejira Molinaora.
- 13:30: Haurren bazkaria.
- 15:00: Helduen bazkaria. Ondoren, jolasak.
- 18:00: Tapia eta Leturiaren kontzertua.
- 20:00: Kalejira herrira bueltan, Joselontxos txarangarekin.
