Jokin Urain idazle eta preso ohia hil da
2013an irten zen espetxetik 27 urteko kartzelaldia beteta. Espetxe barruan zein kanpoan hainbat liburu idatzi eta euskal errepresaliatuekin eta haien senide eta lagunekin lotutako beste hainbeste proiektu gidatu ditu.
Jokin Urain 'Kixkur' idazlea eta preso ohia. Jokin Urain Larrañaga Kixkur idazle eta preso ohia hil da. Larunbat gauean zendu zen. Mendaroko Alkorta baserrian jaio eta Oreretan bizi zen 2013ko azaroan espetxetik atera zenetik. 27 urte luzeko kartzelaldia beteta utzi zuten aske Urain. 1986an atxilotu zuten eta espetxe ugaritik pasatakoa, preso zela idatzi zuen bere lehen eleberria, Izaina (1990).
Horren ondotik heldu ziren Adlotse (1992), Gatibu sortu nintzen (2000), Errotarria (2006) eta Ez dago etxean (2010). Azken liburua Txomin Iturbe Abasolo ETAko buruzagiaren gainean idatzi zuen Txomin. Aurrera bolie! (2021) biografia hain zuzen ere.
Horretaz gain, hainbat proiektu koordinatu zituen. Tartean, Ametsen liburua (2015). Bere-berea zuen ahots goxo eta tonu pausatuarekin azaldu zion HITZAri “askatasun gabezia bizi dutenen ahotsa” dela liburu hori egindako elkarrizketan. Liburu horretara, 426 preso, iheslari, eta erbesteratuen lanak bildu zituen Urainek, “orain artean ezkutuan edo itzalpean egon direnen ahotsak eta irudiak”, askatasun gabetuen memoria osatzeko.
Amaren etxea (2019) liburuan euskal presoen senideen historia jaso zuen idazle eta preso ohiak. 100 testigantza baino gehiago bildu zituen orri horietara, sufrimenduaz, baina batez ere, maitasunaz eta konstantziaz mintzo den liburua osatzeko. Liburua argitaratzerakoan HITZAk egindako elkarrizketan, memoria biltzearen garrantzia jarri zuen nabarmen: “Gure ibilbidearen memoria ondorengoentzat jasota uztea ezinbestekoa da”. Euskal errepresaliatuen eta haien ingurukoen memoria hori bizirik mantendu eta jasotzeko lan mardula utzi du, beste askoren artean, legatu.
Azken urteak Gararen 7ka astekarian iritzigile aritu da Urain.
Senide eta lagunek bihar eskainiko diote azken agurra Zamalbide auzoko Zentolen Berri beilatokian, 11:15ean.
