Galtzarabordako haur eskola lizitazioaren atzean "akats historikoa" dago PSE-EErentzat
Haur eskolak dituen "gabeziak" konpondu gabe atera duela lizitaziora bigarrenez salatu du alderdi sozialistak.
PSE-EEko Isaac Palencia eta Montse Luis.PSE-EE “Akats historikoa” horrela definitu du alderdi sozialistak Errenteriako Udalak Galtzaraborda auzoan eraikitzea aurreikusia duen haur eskolaren lizitazioa. Alderdi politiko horrentzat, lehen aldian hutsik geldituta, bigarren aldiz atera du udalak proiektua lizitaziora, “dituen hutsuneak zuzendu gabe. Ez dizkiote proiektuari beharrezko hobekuntzak egin, diru zatia handitu baino, 250.000 euro gehiago bideratuta”.
“Inprobisatzea eta ez entzutea” egotzi dizkio udal gobernuari, “proiektua hobetzea dagoela nabarmen gelditu denean ere”. Alderdi sozialistaren esanetan, goiko auzoetan haur eskola egiteko proposamena eurena da, “2023an hauteskunde kanpainan egindakoa, beste alderdiek planteatu ere egin ez zutenean. Hala ere, udal gobernuak poretua elkarrizketarik gabe, poarte hartzerik gabe eta ekarpenik onartu gabea garatzea erabaki zuen”.
PSE-EEk planteatzen dituen hobekuntzak aletu ditu: “edukiera nahikoa izango duen haur eskola, dagoen eskaera asetzeko nahikoa eta urte pare batean txiki geldituko ez dena; sukalde propioa izango duena baita jangela zerbitzua ere gurasoek janaria tupperretan eraman behar ez dezaten; kanpo eremu zabal eta egokiak izatea haurren garapenerako ezinbestekoak; eta psikomotrizitate aretoa duena, 0-2 urteko aldian ezinbestekoa dena”.
Ez da hor gelditu sozialisten kritika. Eremu horretan kokatutako Urdaburu plaza ere izan dute hizpide, “agintaldi konpromisoa bada ere, ez da bertarako aurrera urratsik egin, ez dago proiekturik, ez eperik, ezta aurrekonturik ere”.
